গুৱাহাটী:
ট্ৰেইনত যাত্ৰা কৰাৰ সময়ত ৰহস্যজনক পৰিস্থিতিত প্ৰাণ হেৰুওৱা অসমীয়া যুৱতী তথা নৃত্যশিল্পী হিমশ্ৰী বৰাৰ মৃত্যুৰ ঘটনা সন্দৰ্ভত ন্যায়ৰ দাবীত উত্তাল হৈ পৰিছে ৰাজ্য। সদৌ অসম ছাত্ৰ সন্থা (আছু)-ৰ নেতৃত্বত গুৱাহাটীকে ধৰি ৰাজ্যৰ বিভিন্ন প্ৰান্তত এক প্ৰতিবাদী কাৰ্যসূচী ৰূপায়ণ কৰা হয়। মৃত হিমশ্ৰী বৰাৰ মৃত্যুৰ সঠিক কাৰণ উদ্ঘাটন আৰু দোষীক কঠোৰ শাস্তি প্ৰদানৰ দাবীত আছুৱে কেইবাটাও প্ৰতিবাদী কাৰ্যসূচী গ্ৰহণ কৰাৰ লগতে মমবাতি সমদল (Candle March) বাহিৰ কৰে।
উল্লেখ্য যে, ২১ বৰ্ষীয় হিমশ্ৰী বৰা এটা নৃত্য দলৰ লগত অন্ধ্ৰপ্ৰদেশৰ বিশাখাপত্তনমলৈ গৈছিল আৰু উভতি অহাৰ পথত ডিব্ৰুগড়গামী ভিভেক এক্সপ্ৰেছত ৰহস্যজনকভাৱে নিখোজ হৈছিল। পৰৱৰ্তী সময়ত অন্ধ্ৰপ্ৰদেশৰ শ্ৰীকাকুলাম জিলাৰ এটা ৰে'ল পথৰ কাষৰ পৰা তেওঁৰ মৃতদেহ উদ্ধাৰ কৰা হয়। যাত্ৰাকালত তেওঁ বন্ধু-বান্ধৱীক বাৰ্ত প্ৰেৰণ কৰি তেওঁৰ চাৰিওফালে একাংশ লোকে অসৎ আচৰণ কৰাৰ সন্দেহ প্ৰকাশ কৰিছিল। এই মৰ্মান্তিক ঘটনাই সমগ্ৰ অসমতে তীব্ৰ প্ৰতিক্ৰিয়াৰ সৃষ্টি কৰিছে।
প্ৰতিবাদস্থলীৰ পৰা আছুৰ নেতৃত্বই অভিযোগ কৰে যে, ৰে'লৱে কৰ্তৃপক্ষ আৰু সংশ্লিষ্ট প্ৰশাসনে সময়মতে উচিত পদক্ষেপ গ্ৰহণ নকৰাৰ বাবেই এই দুৰ্ভাগ্যজনক ঘটনা সংঘটিত হৈছে। ছাত্ৰ সন্থাই এই ঘটনাৰ এক নিৰপেক্ষ, সময়ৱদ্ধ (time-bound) আৰু উচ্চ পৰ্যায়ৰ তদন্তৰ দাবী জনাইছে যাতে সমগ্ৰ সত্য পোহৰলৈ আহে। ইফালে, ৰাজ্য চৰকাৰেও এই ঘটনাক গুৰুত্ব সহকাৰে লৈ অন্ধ্ৰপ্ৰদেশ চৰকাৰ আৰু কেন্দ্ৰীয় ৰে'ল মন্ত্ৰালয়ৰ সৈতে যোগাযোগ অব্যাহত ৰাখিছে।
