নতুন দিল্লী: ক'কৰোচ্ছ জনতা পাৰ্টী (চিজেপি) য়ে কেন্দ্ৰীয় চৰকাৰৰ বিৰুদ্ধে পুনৰ তীব্ৰ আন্দোলন গড়ে তোলাৰ হুংকাৰ প্ৰদান কৰিছে। কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ পিছতে ৩৬ দিনীয়া ছাত্ৰ প্ৰতিবাদৰ অন্ত পৰিছিল যদিও, বৰ্তমান চৰকাৰ আৰু প্ৰতিবাদকাৰীসকলৰ মাজত নতুনকৈ আইনী সংঘাতৰ আশংকাই দেখা দিছে। প্ৰতিবাদকাৰী ছাত্ৰ-ছাত্ৰী তথা কৰ্মীসকলৰ বিৰুদ্ধে দাখিল কৰা এফআইআৰ আৰু গোচৰসমূহ শীঘ্ৰে প্ৰত্যাহাৰ নকৰিলে পুনৰ ৰাজপথলৈ ওলাই আহিবলৈ বাধ্য হ'ব বুলি চিজেপিয়ে চৰকাৰক কঠোৰ সকীয়নী প্ৰদান কৰিছে।
সোমবাৰে ৰাজ্যসভাৰ জ্যেষ্ঠ সাংসদ তথা প্ৰখ্যাত অধিবক্তা কপিল ছিবালৰ সৈতে যুটীয়াভাৱে আয়োজিত এক গুৰুত্বপূর্ণ সংবাদমেলত চিজেপিৰ মুখপাত্ৰ সৌৰভ দাসে এই সন্দৰ্ভত সৱিনয় বাৰ্তা প্ৰকাশ কৰে। তেওঁ কয় যে আন্দোলন স্থগিত ৰখাৰ সময়তো তেওঁলোকে আশংকা কৰিছিল যে প্ৰতিবাদ শান্ত হোৱাৰ লগে লগে চৰকাৰী সংস্থাসমূহে প্ৰতিবাদকাৰীসকলক টাৰ্গেট কৰিবলৈ আৰম্ভ কৰিব।
সংবাদমেলত সৌৰভ দাসে স্পষ্ট কৰি কয়, "ভাৰত চৰকাৰে আমাক স্পষ্টভাৱে আশ্বাস দিছিল যে বিজেপি বা এনডিএ শাসিত কোনো ৰাজ্যতে প্ৰতিবাদকাৰীৰ বিৰুদ্ধে কোনো শাস্তিমূলক ব্যৱস্থা গ্ৰহণ কৰা নহ'ব। কিন্তু তাৰ বিপৰীতে অসম, পশ্চিমবংগ আৰু বিহাৰৰ পৰা যিবোৰ খবৰ আহিছে, সেয়া অত্যন্ত চিন্তনীয়।" দলৰ আন এগৰাকী নেতা আশুতোষ ৰাংকাই উল্লেখ কৰে যে প্ৰথম দিনাৰ পৰাই ছাত্ৰ-ছাত্ৰীক আইনী আৰু চিকিৎসা সাহায্য প্ৰদান কৰি অহা হৈছে আৰু এই অন্যায়মূলক গোচৰসমূহ উঠাই নল'লে পৰিস্থিতি পুনৰ উত্তপ্ত হৈ পৰিব।
ইফালে, সংবাদমেলত উপস্থিত থাকি জ্যেষ্ঠ অধিবক্তা কপিল ছিবালয়ে প্ৰতিবাদকাৰী ছাত্ৰ-ছাত্ৰীসকলৰ সুৰক্ষাৰ বাবে গুৰুত্বপূর্ণ ঘোষণা কৰে। তেওঁ ছাত্ৰ-ছাত্ৰীসকলৰ আইনী যুঁজৰ সহায়ৰ বাবে নিজাববীয়াকৈ ১ কোটি টকাৰ বৰঙণিৰে এটি 'আইনী প্ৰতিৰক্ষা পুঁজি' (Legal Defense Fund) গঠনৰ কথা ঘোষণা কৰে। লগতে, দেশৰ সমগ্ৰ অধিবক্তা সমাজক মিছা গোচৰৰ সন্মুখীন হোৱা ছাত্ৰসকলৰ কাষত থিয় দিবলৈ তেওঁ আহ্বান জনায়। চিজেপিয়ে ছাত্ৰ-ছাত্ৰীৰ ওপৰত চলা পুলিচৰ বৰ্বৰতাৰ অভিযোগ পঞ্জীয়ন কৰিবলৈ এক বিশেষ 'সাক্ষী' মঞ্চও মুকলি কৰিছে।
