পেছাৱৰ: পাকিস্তানৰ উত্তৰ-পশ্চিম প্ৰান্তৰ পেছাৱৰ চহৰত সংঘটিত হৈছে এক ভয়ংকৰ আৰু হৃদয়বিদাৰক দুৰঘটনা।
স্থানীয় প্ৰশাসন আৰু উদ্ধাৰকাৰী দলৰ পৰা পোৱা খবৰ অনুযায়ী, পেছাৱৰৰ খাইবাৰ পখতুনখোৱা প্ৰদেশৰ ‘আল-খাইৰ এডিকেশ্বন চেণ্টাৰ’ নামৰ বেচৰকাৰী বিদ্যালয়খনত এই দুৰ্যোগ ঘটে। ঘটনাৰ সময়ত বিদ্যালয়খনৰ তিনিটা শ্ৰেণীকক্ষত প্ৰায় ১১০ গৰাকী শিক্ষাৰ্থীয়ে পঢ়া-শুনা কৰি আছিল। হঠাতে ছাদখন খহি পৰাত কণমানি শিশুসকল তাৰ তলত চাপা পৰে।
দুৰ্ঘটনাৰ পিছতে স্থানীয় লোক আৰু উদ্ধাৰকাৰী দলবোৰে ততাতৈয়াকৈ উদ্ধাৰ অভিযান আৰম্ভ কৰে। বহুতে নিজৰ হাতেৰে ভঙা ইটা আৰু আৱৰ্জনা আঁতৰাই শিশুসকলক উদ্ধাৰ কৰিবলৈ প্ৰাণপণ চেষ্টা চলায়। এই দুৰ্ঘটনাটোত ৫০ গৰাধিক লোক গুৰুতৰভাৱে আঘাতপ্ৰাপ্ত হয়, যিসকলক ততাতৈয়াকৈ নিকটৱৰ্তী লেডী ৰিডিং হাস্পতাললৈ ভৰ্তি কৰোৱা হয়। চিকিৎসালয়ৰ বাহৰত নিজৰ সন্তানৰ সন্ধানত ভিৰ কৰা উদ্বিগ্ন আৰু কান্দোনত ভাঙি পৰা অভিভাৱকৰ দৃশ্যই এক মৰ্মান্তিক পৰিৱেশৰ সৃষ্টি কৰে।
প্ৰাথমিক তদন্তত পোহৰলৈ অহা মতে, বিদ্যালয়খনৰ অট্টালিকাটো অতি দুৰ্বল আৰু মানদণ্ডহীন আঢ়ৈ-পকী সামগ্ৰীৰে নিৰ্মিত আছিল।
পাকিস্তানৰ প্ৰধানমন্ত্ৰী শ্বহবাজ শ্বৰীফ আৰু ৰাষ্ট্ৰপতি আচিফ আলী জাৰ্দাৰীয়ে এই দুৰঘটনাটোত গভীৰ শোক প্ৰকাশ কৰাৰ লগতে শোকসন্তপ্ত পরিবারসমূহলৈ সমবেদনা জ্ঞাপন কৰিছে।
