নতুনদিল্লী: ওমান উপকূলৰ সমীপত আৰু হৰমুজ প্ৰণালী অতিক্ৰম কৰাৰ সময়ত পাণামাৰ নিচানযুক্ত এখন বাণিজ্যিক জাহাজত (MT On Peace) হোৱা এক ভয়ানক আক্ৰমণত ১১ গৰাকী ভাৰতীয় নাৱিকসহ মুঠ ১২ গৰাকী কেবিন ক্ৰু আহত হৈছে।
ভাৰতীয় বৈদেশিক মন্ত্ৰালয়ৰ (MEA) তৰফৰ পৰা জাৰি কৰা এক চৰকাৰী বিবৃতিত কোৱা হৈছে যে 'এমটি অন পিচ' (MT On Peace) নামৰ বাণিজ্যিক জাহাজখনত এটা ক্ষিপ্ৰগামী প্ৰজেক্টাইল বা ক্ষেপণাস্ত্ৰই আক্ৰমণ কৰে।
ওমান প্ৰশাসনৰ সহযোগিতাত উদ্ধাৰ কাৰ্য:
ঘটনাটোৰ খবৰ পোৱাৰ লগে লগে ওমানৰ স্থানীয় প্ৰশাসনে তৎপৰতা প্ৰদৰ্শন কৰে। ওমান চৰকাৰ আৰু সংশ্লিষ্ট কৰ্তৃপক্ষৰ সহযোগিতাত আক্ৰমণত আহত হোৱা নাৱিকসকলক জাহাজখনৰ পৰা সুৰক্ষিতভাৱে উদ্ধাৰ কৰা হয়। বৰ্তমান আহত নাৱিকসকলক ওমানৰ খাচাব (Khasab) স্থিত চিকিৎসালয়ত ভৰ্তি কৰাই জৰুৰী চিকিৎসা প্ৰদান কৰা হৈছে। ভাৰত চৰকাৰে এই সমগ্ৰ সাহায্য আৰু উদ্ধাৰ কাৰ্যত সহযোগিতা আগবঢ়োৱাৰ বাবে ওমান প্ৰশাসনক আন্তৰিক ধন্যবাদ জ্ঞাপন কৰিছে।
ভাৰতৰ গভীৰ উদ্বেগ আৰু সঁহাৰি:
বৈদেশিক মন্ত্ৰালয়ে স্পষ্ট কৰি কয় যে আন্তঃৰাষ্ট্ৰীয় জলপথত বাণিজ্যিক জাহাজসমূহৰ ওপৰত বাৰে বাৰে হৈ থকা এনে আক্ৰমণৰ ঘটনাসমূহ ভাৰতৰ বাবে অত্যন্ত চিন্তাৰ বিষয়। আঞ্চলিক শান্তি আৰু স্থিৰতা বজাই ৰখাৰ স্বাৰ্থত এই ধৰণৰ আক্ৰমণ তৎক্ষণাৎ বন্ধ হোৱাটো প্ৰয়োজনীয় বুলি নতুন দিল্লীয়ে পুনৰবাৰ সোঁৱৰাই দিছে।
বিবৃতিটোত লগতে কোৱা হৈছে যে, "সাগৰীয় জলপথত বাণিজ্যিক জাহাজ, নাৱিক আৰু সাধাৰণ নাগৰিকৰ অট্টালিকা বা আন্তঃগাঁথনি ল্য কৰি আক্ৰমণ কৰা পৰিঘটনা শীঘ্ৰে বন্ধ হোৱা উচিত।" ইয়াৰ লগতে আন্তঃৰাষ্ট্ৰীয় জলপথেৰে সুৰক্ষিত যাতায়াত আৰু বাণিজ্যিক কাৰ্যকলাপ পুনৰ বাহাল কৰিবলৈ বিশ্বৰ প্ৰতিটো পক্ষকে আহ্বান জনাইছে ভাৰতে।
