তেহেৰান: ভাৰতীয় উপমহাদেশ তথা মধ্যপ্ৰাচ্যত তীব্ৰ পৰিস্থিতিৰ মাজতে ইৰানে আমেৰিকাক এক কঠোৰ বাৰ্তা প্ৰেৰণ কৰিছে। ইৰানৰ কেন্দ্ৰীয় সামৰিক কমাণ্ড ‘খাতাম আল-আনবিয়া চেণ্ট্ৰেল হেডকোৱাৰ্টাৰ্ছ’ (Khatam al-Anbiya Central Headquarters)-এ ৰাজহুৱা কৰা এক বিবৃতিত স্পষ্ট কৰি দিছে যে, যদি আমেৰিকাই ইৰানৰ বিৰুদ্ধে আক্ৰমণাত্মক সামৰিক কাৰ্যসূচী পুনৰ আৰম্ভ কৰে, তেন্তে পশ্চিম এছিয়াত থকা আমেৰিকাৰ সকলো সামৰিক ঘাটি আৰু গুৰুত্বপূৰ্ণ স্বাৰ্থ ইৰানৰ পোনপটীয়া আক্ৰমণৰ লক্ষ্য হৈ পৰিব। এই আক্ৰমণ অতি ভয়ানক, অবিৰত আৰু কাৰ্যকৰী হ’ব বুলিও স্পষ্ট কৰি দিয়া হৈছে।
ইৰানৰ এই সামৰিক কমাণ্ডৰ মতে, আমেৰিকাই অঞ্চলটোৰ কেইখনমান দেশৰ সহযোগিতাত ইৰানৰ ওপৰত আক্ৰমণ পুনৰ আৰম্ভ কৰাৰ পূৰ্ণ প্ৰস্তুতি চলাইছে। ইৰানে লগতে স্পষ্ট কৰি দিছে যে, যিবোৰ আঞ্চলিক দেশে আমেৰিকাৰ এই সামৰিক পদক্ষেপে মিত্ৰতা কৰিব, তেওঁলোকক এই সংঘাতৰ অংশীদাৰ হিচাপে গণ্য কৰা হ’ব আৰু ইৰানৰ সশস্ত্ৰ বাহিনীয়ে তেওঁলোকৰ প্ৰতি কোনো ধৰণৰ নমনীয়তা প্ৰদৰ্শন নকৰিব।
নৌ-অৱৰোধ আৰু আমেৰিকাৰ সঁহাৰি:
শেহতীয়া দিনবোৰত আমেৰিকা আৰু ইৰানৰ মাজত উত্তেজনা চৰম সীমা পাইছেহি। আমেৰিকাৰ কেন্দ্ৰীয় কমাণ্ডে (CENTCOM) ইৰানৰ বন্দৰসমূহৰ ওপৰত কঠোৰ নৌ-অৱৰোধ (naval blockade) অব্যাহত ৰাখিছে। সূত্ৰ অনুসৰি, এই নীতি কাৰ্যকৰী কৰিবলৈ এতিয়ালৈকে ১০৯ টা বাণিজ্যিক জাহাজ গতিপথ সলনি কৰিবলৈ বাধ্য কৰোৱা হৈছে। ইফালে, বিশ্বৰ অন্যতম গুৰুত্বপূৰ্ণ শক্তি কৰিডৰ আৰু বাণিজ্য পথ ‘হৰমুজ প্ৰণালী’ (Strait of Hormuz) ক লৈও চিন্তিত হৈ পৰিছে আন্তৰ্জাতিক মহল।
আমেৰিকাৰ ৰাষ্ট্ৰপতি ডনাল্ড ট্ৰাম্পে ইতিমধ্যে ইৰানৰ এই স্থিতিৰ বিৰুদ্ধে গুৰুত্বপূৰ্ণ সিদ্ধান্ত গ্ৰহণৰ দিশে আগবাঢ়িছে বুলি ইংগিত দিছে। তেওঁ সতৰ্ক কৰি দিছে যে ইৰানে সঠিক পথ নল’লে ইয়াৰ পৰিণতি অতি ভয়াৱহ হ’ব। ইফালে, কাটাৰৰ মধ্যস্থতাত সংঘাত অন্ত পেলাবলৈ ইৰানে কেইটামান চৰ্ত দাঙি ধৰিছে, যাৰ ভিতৰত শত্ৰুতা অৱসান, ইৰানৰ আবদ্ধ ধন মুকলি কৰা আৰু নৌ-অৱৰোধ প্ৰত্যাহাৰ কৰাটো অন্তৰ্ভুক্ত আছে।
পৰিস্থিতিৰ গুৰুত্বলৈ লক্ষ্য ৰاخি আমেৰিকা যুক্তৰাষ্ট্ৰৰ বৈদেশিক বিভাগে ইতিমধ্যে পশ্চিম এছিয়াৰ কেইবাখনো দেশত বসবাস কৰা আমেৰিকান নাগৰিকসকলৰ বাবে সুৰক্ষা সতৰ্কতা জাৰি কৰিছে আৰু যিকোনো পৰিস্থিতিৰ বাবে সাজু থাকিবলৈ পৰামৰ্শ দিছে।
