নতুনদিল্লী: দিল্লীৰ ইন্দিৰা গান্ধী আন্তঃৰাষ্ট্ৰীয় (IGI) বিমান বন্দৰত এক ডাঙৰ সুৰক্ষা ত্ৰুটি পোহৰলৈ আহিছে। বাধ্যতামূলক ইমিগ্ৰেচন ক্লিয়াৰেন্স বা প্ৰক্ৰিয়া সম্পূৰ্ণ নকৰাকৈয়ে তিনিজন ইটালীয় নাগৰিকে ভাৰত ত্যাগ কৰি পোনপটীয়াকৈ জাৰ্মানীৰ মিউনিখলৈ উৰা মৰা ঘটনাই সমগ্ৰ দেশতে চাঞ্চল্যৰ সৃষ্টি কৰিছে। এই গুৰুতৰ সুৰক্ষা আৰু ইমিগ্ৰেচন সংক্রান্তীয় ত্ৰুটিৰ বাবে কেন্দ্ৰীয় অসামৰিক বিমান পৰিবহন মন্ত্ৰালয়ে (MoCA) টাটা গ্ৰুপৰ মালিকানাধীন ‘এয়াৰ ইণ্ডিয়া’ (Air India) বিমান সেৱা সংস্থাক এক কঠোৰ কাৰণ দৰ্শোৱাৰ জাননী (Show-cause notice) জাৰি কৰিছে। মন্ত্ৰালয়ে বিমান সংস্থাক ৭ দিনৰ ভিতৰত ইয়াৰ উপযুক্ত স্পষ্টীকৰণ দিবলৈ নিৰ্দেশ দিছে।
আচলতে কি ঘটেছিল?
প্ৰাপ্ত তথ্য অনুসৰি, ঘটনাটো সংঘটিত হৈছিল গত ৪ ছেপ্টেম্বৰৰ পুৱতি নিশাত। উক্ত তিনিজন ইটালীয় যাত্ৰীয়ে এয়াৰ ইণ্ডিয়াৰ ‘AI-1115’ নম্বৰৰ বিমানখনত অমৃতসৰৰ পৰা দিল্লীলৈ আহিছিল। তেওঁলোকে দিল্লী বিমান বন্দৰত উপস্থিত হোৱাৰ প্ৰায় এক ঘণ্টাৰ মুমূৰ্তিতে, অৰ্থাৎ নিশা প্ৰায় ১:৪৫ বজাত, লুফথানছা বিমান সেৱাৰ (Lufthansa Flight LH-763) দ্বাৰা মিউনিখলৈ যাত্ৰা কৰে। কিন্তু আচৰিত কথা যে, তেওঁলোকে ভাৰত এৰি যোৱাৰ পূৰ্বৰ বাধ্যতামূলক ইমিগ্ৰেচন পৰীক্ষা বা ক্লিয়াৰেন্স গ্ৰহণ কৰা নাছিল।
মানক প্ৰণালী (SOP) উলংঘনৰ অভিযোগ:
কেন্দ্ৰীয় মন্ত্ৰালয়ে জাৰি কৰা জাননীখনত উল্লেখ কৰা হৈছে যে যাত্ৰী কেইজন এয়াৰ ইণ্ডিয়াৰ ‘হাব-এণ্ড-স্প’ক’ (Hub-and-Spoke) ব্যৱস্থাৰ অধীনত ভ্ৰমণ কৰি আছিল। এই ব্যৱস্থা অনুসৰি সাধাৰণতে সৰু বিমান বন্দৰৰ পৰা যাত্ৰীসকলক এটা মুখ্য কেন্দ্ৰলৈ অনা হয় আৰু তাৰ পৰা আন্তঃৰাষ্ট্ৰীয় বিমানলৈ সংযোগ কৰা হয়। অৱশ্যে, এই বিশেষ যাত্ৰীসকলৰ বেল্লাত নীতি-নিয়মৰ আসোঁৱাহ ৰৈ যোৱাৰ বাবে তেওঁলোকক ইমিগ্ৰেচন কাউণ্টাৰলৈ যোৱাৰ পৰিৱৰ্তে ভুলবশতঃ আন্তঃৰাষ্ট্ৰীয় ট্ৰেন্সফাৰ এরিয়ালৈ লৈ যোৱা হৈছিল। ফলত তেওঁলোকে কোনো বাধা নোহোৱাকৈয়ে পোনে পোনে বিমানত উঠি গুচি যাবলৈ সক্ষম হয়।
পাচত তথ্য পুনৰীক্ষণ (manual reconciliation) কৰাৰ সময়তহে এই বৃহৎ ত্ৰুটিটো পোহৰলৈ আহে। এই ঘটনাৰ প্ৰতি লক্ষ্য ৰহি কেন্দ্ৰীয় গৃহ মন্ত্ৰালয়েও শীৰ্ষ পৰ্যায়ৰ বৈঠক আহ্বান কৰিছে বুলি জানিব পৰা গৈছে। বিমান বন্দৰৰ সুৰক্ষা ব্যৱস্থা আৰু এয়াৰ ইণ্ডিয়াৰ গ্ৰাউণ্ড হেণ্ডলিং কৰ্মচাৰীসকলৰ দায়িত্বহীনতাৰ প্ৰতি লক্ষ্য ৰাখি ইয়াৰ বিৰুদ্ধে কি কি ব্যৱস্থা গ্ৰহণ কৰা হ’ব, সেয়া এতিয়া লক্ষণীয় হ’ব।
