বৈদেশিক মন্ত্ৰালয়ৰ মুখপাত্ৰৰ বাৰ্তা
বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে (Randhir Jaiswal) পষেকীয়া সংবাদমেলৰ সময়ত এই প্ৰসংগত মন্তব্য প্ৰকাশ কৰি কয় যে ইটালীৰ সৈতে ভাৰতৰ দ্বিপাক্ষিক সম্পৰ্ক অতিশয় শক্তিশালী। তেওঁ লগতে কয়, "ইটালীৰ সৈতে আমাৰ সম্পৰ্ক শেহতীয়া দিনবোৰত অধিক সম্প্ৰসাৰিত আৰু শক্তিশালী হৈ উঠিছে। কূটনৈতিক নীতি-নিয়ম মানি চলি ইজনে সিজনক সন্মান জনাই আমাৰ এই সম্পৰ্ক আগুৱাই নিয়াটো অতিশয় জৰুৰী।"
কি আছিল সমগ্ৰ বিতৰ্কটো?
বৃহস্পতিবাৰে সন্ধিয়া নতুন দিল্লীত অনুষ্ঠিত ৰাচনাত্মক কংগ্ৰেছৰ এক ৰাজনৈতিক অনুষ্ঠানত ভাষণ প্ৰদান কৰি ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদীৰ বৈদেশিক নীতি আৰু নেতাসকলক সাৱটি ধৰাৰ প্ৰৱণতাক তীব্ৰ সমালোচনা কৰিছিল। তেওঁ কয় যে বৈদেশিক নীতি মানে কেৱল নেতাসকলক সাৱটি ধৰা নহয়। সেই সময়তে কংগ্ৰেছ নেতা সন্দীপ দীক্ষিতে ইটালীৰ প্ৰধানমন্ত্ৰী জৰ্জিয়া মেল’নিৰ প্ৰসংগটোক লৈ ৰাহুল গান্ধীক এটা ধেমধেমীয়া প্ৰশ্ন সুধিছিল। ইয়াৰ পিছতে ৰাহুল গান্ধীয়েও হাস্যকৰভাৱে ইয়াৰ প্ৰত্যুত্তৰ দিয়ে।
এই কথাবতৰা আৰু ভিডিঅ’টো পোহৰলৈ অহাৰ পিছতে শাসকীয় দল বিজেপিয়ে কংগ্ৰেছ নেতাসকলক তীব্ৰ সমালোচনাৰে উভতি ধৰে। ৰাজনৈতিক মহলত এই প্ৰসংগক লৈ জোৰদাৰ চৰ্চা অব্যাহত থকাৰ সময়তে বৈদেশিক পৰিক্ৰমা মন্ত্ৰালয়ে বিষয়টোত দেশৰ বৈদেশিক স্বাৰ্থ আৰু আন্তঃৰাষ্ট্ৰীয় সম্পৰ্কৰ মৰ্যাদা অক্ষুণ্ণ ৰখাৰ বাবে শিষ্টাচাৰ মানি চলিবলৈ সকলোকে আহ্বান জনায়।
