শ্ৰীনগৰ: জম্মু-কাশ্মীৰত ৩৭০ অনুচ্ছেদ (Article 370) বাতিলৰ সপ্তম বৰ্ষপূৰ্তিৰ ঠিক এদিন পূৰ্বে মঙলবাৰে নিশা জম্মু-কাশ্মীৰৰ প্ৰাক্তন মুখ্যমন্ত্ৰী তথা পিপলছ ডেম’ক্ৰেটিক পাৰ্টীৰ (PDP) অধ্যক্ষ মেহবুবা মুফতিয়ে শ্ৰীনগৰত এক প্ৰতিবাদী কাৰ্যসূচী ৰূপায়ন কৰে।  

মেহবুবা মুফতিৰ নেতৃত্বত কেইবা ডজন পিডিপি কৰ্মীয়ে শ্ৰীনগৰস্থিত দলৰ মুখ্য কাৰ্যালয়ৰ বাহিৰত মমবাতি জ্বলাই প্ৰতিবাদী ধৰ্ণা কাৰ্যসূচী ৰূপায়ণ কৰে। এই প্ৰতিবাদৰ সময়ত তেওঁ জম্মু-কাশ্মীৰৰ জনসাধাৰণৰ অধিকাৰ আৰু ২০১৯ চনৰ ৫ আগষ্টত কাঢ়ি লোৱা সাংবিধানিক বিশেষ মৰ্যাদা পুনৰ ঘূৰাই আনিব লাগিব বুলি জোৰ দি মন্তব্য কৰে। 

পিডিপিৰ নেত্ৰীগৰাকীয়ে কয় যে ৫ আগষ্ট, ২০১৯ তাৰিখে লোৱা সিদ্ধান্ত জম্মু-কাশ্মীৰৰ জনসাধাৰণৰ বাবে কেতিয়াও গ্ৰহণযোগ্য নহয়। জনসাধাৰণৰ মৰ্যাদা সুৰক্ষিত কৰাৰ লগতে ৩৭০ অনুচ্ছেদ পুনৰুদ্ধাৰৰ বাবে পিডিপিয়ে একেৰাহে দাবী জনাই আহিছে বুলি উল্লেখ কৰি তেওঁ কয় যে সেইদিনাৰ ক’লা অধ্যায়ৰ পৰিঘটনা ৰাইজে কেতিয়াও পাহৰিব নোৱাৰে। এই প্ৰতিবাদৰ সময়তে মেহবুবা মুফতিয়ে ধৰ্ণা কাৰ্যসূচীত প্ৰতিবাদ কৰিব বিচৰা তেওঁৰ কন্যা ইলটিজা মুফতীক আৰক্ষী বিষয়াই দুৰ্ব্যৱহাৰ কৰাৰো গুৰুতৰ অভিযোগ উত্থাপন কৰে।