তেলেংগানাত সংঘটিত হৈছে এক ভয়ংকৰ ঔদ্যোগিক দুৰ্ঘটনা। যদাদ্রি-ভুবনগিৰি জিলাৰ পোচামপল্লী মণ্ডলৰ দতিগুড়েম গাঁৱত অৱস্থিত 'হেজেলো লেব প্ৰাইভেট লিমিটেড' (Hazelo Lab Pvt Ltd) নামৰ ফাৰ্মাচিউটিকেল কোম্পানীটোত শুকুৰবাৰে নিশা এক প্ৰচণ্ড ৰিয়েক্টৰ বিস্ফোৰণ ঘটে। এই দুৰ্ঘটনাৰ ফলত ঘটনাস্থলীতে ২ জন শ্ৰমিকে প্ৰাণ হেৰুৱায় আৰু আন ৯ জন লোক গুৰুতৰভাৱে আহত হয়।
প্ৰাপ্ত তথ্য অনুসৰি, শুকুৰবাৰে নিশা প্ৰায় ১০:৩০ বজাৰ সময়ত শ্ৰমিকসকলে শ্বিফট সলনি কৰি থকা অৱস্থাত এই বিস্ফোৰণটো সংঘটিত হয়। বিস্ফোৰণৰ পাছতেই কাৰখানাটোত ভয়াৱহ অগ্নিকাণ্ডৰ সূত্ৰপাত ঘটে। খবৰ পোৱাৰ লগে লগে চৌটুপ্পল আৰু কাষৰীয়া অঞ্চলৰ পৰা অগ্নিনিৰ্বাপক বাহিনীৰ কেইবাখনো গাড়ী ঘটনাস্থলীত উপস্থিত হৈ দীৰ্ঘসময়ৰ প্ৰচেষ্টাৰ অন্তত জুই নুমুৱাবলৈ সক্ষম হয়।
আহতসকলৰ ভিতৰত দুগৰাকীৰ শৰীৰ ৫০ শতাংশতকৈ অধিক দগ্ধ হৈছে বুলি আৰক্ষী সূত্ৰত প্ৰকাশ। আটাইকেইজন আহতকে উন্নত চিকিৎসাৰ বাবে ততাতৈয়াকৈ স্থানীয় চিকিৎসালয়লৈ প্ৰেৰণ কৰা হৈছে। আৰক্ষীয়ে ঘটনা সন্দৰ্ভত এক গোচৰ ৰুজু কৰি তদন্ত আৰম্ভ কৰিছে। বিস্ফোৰণৰ প্ৰকৃত কাৰণ এতিয়াও নিশ্চিত হোৱা নাই যদিও প্ৰাথমিকভাৱে ৰিয়েক্টৰৰ ত্ৰুটিৰ বাবেই এই অঘটন ঘটা বুলি সন্দেহ কৰা হৈছে।
