ৱাশ্বিংটন: দীৰ্ঘদিনীয়া মিত্ৰ ৰাষ্ট্ৰ আমেৰিকা আৰু কানাডাৰ মাজত আৰম্ভ হৈছে তীব্ৰ বাণিজ্যিক সংঘাত। শেষ মুহূৰ্তলৈকে চলা আলোচনা ব্যৰ্থ হোৱাৰ পাছত আমেৰিকা যুক্তৰাষ্ট্ৰই কানাডাৰ প্ৰায় ২০ বিলিয়ন ডলাৰ মূল্যৰ সামগ্ৰীৰ ওপৰত ৫০ শতাংশ শুল্ক আৰোপ কৰিছে। শনিবাৰৰ পৰা এই নতুন নিৰিখ কাৰ্যকৰী হৈছে।
এই সিদ্ধান্তৰ বিৰুদ্ধে তীব্ৰ প্ৰতিক্ৰিয়া প্ৰকাশ কৰিছে কানাডাৰ প্ৰধানমন্ত্ৰী মাৰ্ক কাৰ্নিয়ে। তেওঁ ঘোষণা কৰিছে যে কানাডাই আমেৰিকাৰ এই কাৰ্যক 'ডলাৰৰ বিপৰীতে ডলাৰ' হিচাপে প্ৰত্যুত্তৰ দিব। অৰ্থাৎ আমেৰিকাই যিমান মূল্যৰ শুল্ক আৰোপ কৰিছে, কানাডায়ো সমপৰিমাণৰ শুল্ক আমেৰিকান সামগ্ৰীৰ ওপৰত জাপি দিব।
কিয় এই সংঘাত?
সূত্ৰ অনুসৰি, বাণিজ্যিক চুক্তিৰ ক্ষেত্ৰত কানাডাই কিছুমান বিশেষ ক্ষেত্ৰত ৰেহাই বিচাৰিছিল যদিও আমেৰিকা এই দাবীত সন্মত হোৱা নাছিল। আমেৰিকাৰ বাণিজ্য প্ৰতিনিধি জেমিছন গ্ৰীৰৰ মতে, কানাডাই পূৰ্বতে একমত হোৱা চৰ্তসমূহ মানি ল’বলৈ অস্বীকাৰ কৰাত এই কঠোৰ সিদ্ধান্ত ল’বলগীয়া হয়। আনহাতে, কানাডাৰ প্ৰধানমন্ত্ৰী কাৰ্নিয়ে অভিযোগ কৰিছে যে আমেৰিকাৰ প্ৰস্তাৱসমূহ অযুক্তিকৰ আৰু ই কানাডাৰ শ্ৰমিক তথা ব্যৱসায়ীসকলৰ স্বাৰ্থৰ বিপৰীতে।
কাৰ ওপৰত পৰিব প্ৰভাৱ?
এই নতুন শুল্কৰ আওতাত কানাডাৰ পৰা আমেৰিকালৈ অহা প্ৰায় ৫ শতাংশ সামগ্ৰী পৰিব। ইয়াৰ ভিতৰত হকী ষ্টিকৰ পৰা আৰম্ভ কৰি দৈনন্দিন ব্যৱহাৰ্য বহু সামগ্ৰী অন্তৰ্ভুক্ত আছে। বিশেষজ্ঞসকলৰ মতে, এই বাণিজ্যিক যুদ্ধই কেৱল কানাডাকেই নহয়, আমেৰিকাৰ বজাৰতো মূল্যবৃদ্ধিৰ হেঁচা সৃষ্টি কৰিব পাৰে।
বৰ্তমান দুয়োখন দেশৰ মাজত বাণিজ্যিক আলোচনা সম্পূৰ্ণৰূপে স্থগিত ৰখা হৈছে। এই পৰিস্থিতিয়ে উত্তৰ আমেৰিকাৰ বাণিজ্য চুক্তিক লৈও নতুন অনিশ্চয়তাৰ সৃষ্টি কৰিছে।
