গুৱাহাটীত প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ ভূমি বেদখল; তদন্তৰ বাবে যোৱা আৰক্ষীক আক্ৰমণ

গুৱাহাটী: সাধাৰণ জনতাৰ কথা বাদেই, এইবাৰ ভূ-মাফিয়াৰ কৱলৰ পৰা সাৰি নগ’ল ৰাজ্যৰ এগৰাকী প্ৰাক্তন মুখ্যমন্ত্ৰীৰ ব্যক্তিগত সম্পত্তিও। ৰাজ্যৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ হাতীগাঁৱৰ সুন্দৰবন নগৰৰ বালিজানত থকা ২৮ বিঘা ভূমি ভূ-মাফিয়াই বেদখল কৰাক কেন্দ্ৰ কৰি সৃষ্টি হৈছে উত্তপ্ত পৰিস্থিতি।

ঘটনাৰ বিৱৰণি অনুসৰি, প্ৰাক্তন সাংসদ তথা প্ৰফুল্ল কুমাৰ মহন্তৰ পত্নী জয়শ্রী গোস্বামী মহন্তই এই বেদখলৰ বিৰুদ্ধে হাতীগাঁও থানাত এখন এজাহাৰ দাখিল কৰিছিল। এই এজাহাৰৰ ভিত্তিত তদন্ত চলাবলৈ হাতীগাঁও আৰক্ষীৰ এটা দল বালিজানত উপস্থিত হয়। অৱশ্যে আৰক্ষীৰ দলটো উপস্থিত হোৱাৰ লগে লগেই একাংশ বেদখলকাৰীয়ে হাতে হাতে লাঠি, দা আৰু ৰড লৈ আৰক্ষীৰ ওপৰত মৰণপণ আক্ৰমণ চলায়।