গুৱাহাটী: ৰাজ্যখনত অব্যাহত থকা ভয়ংকৰ বান পৰিস্থিতিৰ মাজতে মঙলবাৰে অসম বিধানসভাত এক ব্যতিক্ৰমী আৰু মানৱীয় ছবি ফুটি উঠিল। উজনি অসমৰ বানাক্ৰান্ত লোকসকলক সকাহ দিয়াৰ উদ্দেশ্যে শাসকীয় দল আৰু বিৰোধী দলৰ প্ৰতিগৰাকী সদস্যই দলীয় মতভেদ পাহৰি একতৃত্ববদ্ধ হৈ এমাহৰ দৰমহা মুখ্যমন্ত্ৰীৰ সাহায্য পুঁজিলৈ আগবঢ়োৱাৰ কথা ঘোষণা কৰে।
মঙলবাৰে বিধানসভাৰ শূন্যকালীন ঘণ্টাত অধ্যক্ষ ৰণজিৎ কুমাৰ দাসে চলিত বাজেট অধিৱেশন ২৯ জুলাইত সমাপ্ত কৰাৰ কথা ঘোষণা কৰে। বানপীড়িত লোকসকলৰ ওচৰলৈ গৈ পৰিস্থিতিৰ প্ৰত্যক্ষ বুজ ল'ব পৰাকৈ আৰু তেওঁলোকক প্ৰয়োজনীয় সহায়-সহযোগিতা আগবঢ়াবলৈ সুবিধাজনক হ'ব বুলি এই বিশেষ সিদ্ধান্ত গ্ৰহণ কৰা হয়।
এই ঘোষণাৰ অংশৰূপে অধ্যক্ষ ৰণজিৎ কুমাৰ দাস আৰু উপাধ্যক্ষ ডাঃ হাব্বে টেৰণে তেওঁলোকৰ এমাহৰ দৰমহা মুখ্যমন্ত্ৰীৰ সাহায্য পুঁজিলৈ দান কৰে। ইয়াৰোপৰি, অসম বিধানসভা সচিবালয়ৰ সমগ্ৰ বিষয়া-কৰ্মচাৰীসকলেও তেওঁলোকৰ এদিনৰ দৰমহা বানাক্ৰান্তসকলৰ সাহায্যার্থে প্ৰদান কৰিব বুলি অধ্যক্ষগৰাকীয়ে সদনক অৱগত কৰে।
অধ্যক্ষগৰাকীৰ এই আহ্বানত সঁহাৰি জনাই সংসদীয় পৰিক্ৰমা মন্ত্ৰী পীয়ুষ হাজৰিকাই বিজেপিৰ আটাইকেইগৰাকী বিধায়কে এমাহৰ দৰমহা প্ৰদান কৰিব বুলি নিশ্চিত কৰে। একেদৰে কংগ্ৰেছ দলৰ তৰফৰ পৰা বিৰোধী দলপতি ৱাজেদ আলী চৌধুৰীয়ে কয় যে কংগ্ৰেছে ইতিমধ্যে বানাক্ৰান্ত অঞ্চলত সাহায্য সামগ্ৰী বিতৰণ কৰিছে আৰু দলৰ সকলো বিধায়কে এই মহৎ কাৰ্যৰ বাবে এমাহৰ দৰমহা দান কৰিব।
এআইইউডিএফৰ বিধায়ক মজিবুৰ ৰহমানেও দলীয় সভাপতি বদৰুদ্দিন আজমলে ব্যক্তিগতভাৱে আগবঢ়োৱা ২ কোটি টকাৰ সাহায্যৰ উপৰি দলৰ সকলো বিধায়কে এমাহৰ দৰমহা আৰু দলীয় তৰফৰ পৰা অতিৰিক্ত ২ লাখ টকা দিয়াৰ কথা ঘোষণা কৰে। ইফালে, অসম গণ পৰিষদ (AGP) আৰু বিপিএফ (BPF) দলৰ বিধায়কসকলেও এই সাহায্য প্ৰক্ৰিয়াত সম্পূৰ্ণ সহযোগিতা আগবঢ়োৱাৰ কথা সদনত প্ৰকাশ কৰে।
