গুৱাহাটী: ৰাজ্যত বানৰ ভয়াৱহতা কিছু পৰিমাণে হ্ৰাস পাইছে যদিও ৮ খনকৈ জিলা বৰ্তমানেও প্ৰভাৱিত হৈ আছে। চৰকাৰে আগবঢ়োৱা বানৰ শেহতীয়া তথ্য অনুসৰি গোলাঘাট, শিৱসাগৰ, বিশ্বনাথ, চৰাইদেউ, কামৰূপ (গ্ৰাম্য), যোৰহাট, ধেমাজি আৰু নগাঁও জিলাত এতিয়াও বানৰ প্ৰভাৱ অব্যাহত আছে।
বৰ্তমান ৰাজ্যখনত মুঠ ২,১২,৪৪১ গৰাকী লোক বানৰ কবলত আছে। ইয়াৰোপৰি ১৭১৯৮.০৯ হেক্টৰ কৃষিভূমিও এতিয়া পানীৰ তলত তল গৈছে। বানাক্ৰান্ত অঞ্চলসমূহৰ কেবাহাজাৰো লোকে এতিয়াও বিভিন্ন আশ্ৰয় শিবিৰতে দিন কটাবলগীয়া হৈছে। ইফালে, চৰকাৰী তথ্য অনুসৰি বৰ্তমানলৈকে বানত প্ৰাণ হেৰুওৱা লোকৰ সংখ্যা ৮০ জনলৈ বৃদ্ধি পাইছে।
মুখ্যমন্ত্ৰীৰ গুৰুত্বপূৰ্ণ ঘোষণা আৰু বেংক ঋণ ৰেহাই
ইফালে, বৃহস্পতিবাৰে নিশা ফেচবুক লাইভযোগে মুখ্যমন্ত্ৰী ড° হিমন্ত বিশ্ব শৰ্মাই বান পৰিস্থিতি আৰু সাহায্য সন্দৰ্ভত কেবাটাও গুৰুত্বপূৰ্ণ ঘোষণা কৰে। এই ঘোষণাৰ ভিতৰত আটাইগুৰুত্বপূৰ্ণ আছিল বানপীড়িতসকলৰ বেংক ঋণ সম্পৰ্কীয় বিষয়টো। মুখ্যমন্ত্ৰীয়ে জনায় যে কেন্দ্ৰীয় বিত্তমন্ত্ৰী নিৰ্মলা সীতাৰমণৰ সৈতে আলোচনা কৰাৰ μόৰ্মে ষ্টেট লেভেল বেংকিং কমিটী (SLBC)ৰ সৈতে এখন গুৰুত্বপূৰ্ণ বৈঠক অনুষ্ঠিত কৰা হৈছিল। উক্ত বৈঠকত ভাৰতীয় ৰিজাৰ্ভ বেংক আৰু নাবাৰ্ডকে আদি কৰি গুৰুত্বপূৰ্ণ বিত্তীয় প্ৰতিষ্ঠানসমূহ উপস্থিত আছিল।
বেংকসমূহে দাখিল কৰা তথ্য অনুসৰি শিৱসাগৰ, চৰাইদেউ, যোৰহাট আৰু গোলাঘাট জিলাত প্ৰায় ৩.১৮ লাখ সক্ৰিয় বেংক একাউণ্ট আছে, য'ত বৰ্তমান ১১,৪০০ কোটি টকাৰ ঋণ বাকী আছে। এই ঋণসমূহৰ ভিতৰত কৃষি ঋণ, আত্মসহায়ক গোটৰ মহিলাসকলৰ ঋণ, আৰু ক্ষুদ্ৰ উদ্যোগীসকলৰ ঋণ অন্তৰ্ভুক্ত হৈ আছে।
মুখ্যমন্ত্ৰীয়ে স্পষ্ট কৰি দিয়ে যে কেৱল প্ৰকৃত বানপীড়িত লোকসকলেহে এই ঋণ মাফৰ সুবিধা লাভ কৰিব। চৰকাৰে লাভ কৰা তথ্যসমূহ পুংখানুপুংখভাৱে পৰীক্ষা কৰা হ'ব আৰু ভুৱা তথ্য দাখিল কৰিলে কোনো ৰেহাই দিয়া নহ'ব। লগতে, বানৰ দ্বাৰা ক্ষতিগ্ৰস্ত নোহোৱা লোকসকলে নিয়মীয়াভাৱে বেংক ঋণ পৰিশোধ কৰিব লাগিব। ইফালে, গৃহ ঋণ, শিক্ষামূলক ঋণ, গাড়ীৰ ঋণৰ লগতে কৃষি আৰু আত্মসহায়ক গোটৰ ঋণ পৰিশোধৰ ক্ষেত্ৰতো ছমাহলৈ বিশেষ ৰেহাই দিয়া হ'ব বুলি মুখ্যমন্ত্ৰীয়ে ঘোষণা কৰে।
