বৰ্তমান গোলাঘাট, যোৰহাট, নগাঁও আৰু শিৱসাগৰ জিলাত প্ৰায় ৩১,৯০০ গৰাকী লোক বানৰ দ্বাৰা প্ৰভাৱিত হৈ আছে। ইয়াৰ ভিতৰত নগাঁৱত ২০ হাজাৰ, যোৰহাটত ৫ হাজাৰ আৰু শিৱসাগৰত ৪৫০০ গৰাকী লোক ক্ষতিগ্ৰস্ত হৈছে। প্ৰশাসনে এই জিলাকেইখনত ১৫ টা সাহায্য শিবিৰ আৰু বিতৰণ কেন্দ্ৰ পৰিচালনা কৰিছে, য’ত ২,৭৮২ জন লোকে আশ্ৰয় লৈ আছে।
ৰাজ্যখনৰ প্ৰায় ১৪৭ খন গাঁও পানীৰ তলত থকাৰ লগতে ৩,১৯৮.৭৭ হেক্টৰ শস্য পথাৰ ক্ষতিগ্ৰস্ত হৈছে। লগতে বহু মথাউৰি, পথ আৰু দলং ভাঙি পৰাৰ খবৰ পোৱা গৈছে। ১৬,৩২৩ টা ঘৰচীয়া জীৱ-জন্তু আৰু হাঁহ-কুকুৰাৰো ক্ষতিসাধন হৈছে।
এই সংকটকালীন সময়ত মুখ্যমন্ত্ৰী হিমন্ত বিশ্ব শৰ্মাই বানাক্ৰান্তসকলৰ প্ৰতি চৰকাৰৰ সমৰ্থন ব্যক্ত কৰি কয় যে ইতিমধ্যে ৯৬,৮৪২ টা পৰিয়াললৈ ১৫,০০০ টকাকৈ মুঠ ১৪৬.২৬ কোটি টকাৰ এককালীন সাহায্য প্ৰদান কৰা হৈছে। ইয়াৰ উপৰিও, বানত শৈক্ষিক নথি-পত্ৰ আৰু ৰেচন কাৰ্ড হেৰুওৱা লোকসকলৰ বাবে বিনামূলীয়া প্ৰতিলিপি প্ৰদানৰ ব্যৱস্থাও গ্ৰহণ কৰা হৈছে।
