হাৰাৰে: ক্ৰিকেট পথাৰত এক ৰোমাঞ্চকৰ আৰু লোমহৰ্ষক সংগ্ৰামৰ অন্ত পেলোৱাৰ জৰিয়তে জিম্বাব্য়েৰ বিৰুদ্ধে তৃতীয় তথা অন্তিম এদিনীয়া মেচখনত ১ উইকেটত জয়লাভ কৰিবলৈ সক্ষম হয় অষ্ট্ৰেলিয়া। এই ৰোমাঞ্চকৰ বিজয়ৰ সুবাদতে অতিথি দলটোৱে ৩-০ গ’লে এদিনীয়া শৃংখলাটো দখল কৰি ঘৰুৱা দলটোক ক্লীন চিপ (Clean Sweep) কৰে।
প্ৰথমে বেটিং কৰি জিম্বাব্য়েৱে নিৰ্ধাৰিত ৫০ অভাৰত ৮ উইকেটৰ বিনিময়ত ২৭১ ৰাণৰ এক প্ৰতিযোগিতামূলক স্ক’ৰ থিয় কৰায়। দলৰ হৈ ইনিংচ মুকলি কৰি ইনোচেণ্ট কায়াই ৫৫ ৰাণ আৰু ক্ৰেইগ ইৰভিনে ৫৯ ৰাণ সংগ্ৰহ কৰি দ্বিতীয় উইকেটৰ বাবে ৮০ ৰাণৰ এক সুন্দৰ অংশীদাৰিত্ব গঢ়ি তোলে। অৱশ্যে হেলিৰ আঘাতৰ বাবে ইনোচেণ্ট কায়াই অৱসৰ গ্ৰহণ কৰিবলগীয়া হয়। ইয়াৰ পিছত জিম্বাব্য়েৰ অধিনায়ক ছিকান্দাৰ ৰাজাই দায়িত্বশীল বেটিং প্ৰদৰ্শন কৰি ৭২টা বলতে অপৰাজিত ৮১ ৰাণৰ এক গুৰুত্বপূৰ্ণ ইনিংচ খেলে, যাৰ ফলত দলটোৱে সন্মানজনক স্ক’ৰত উপনীত হ’বলৈ সক্ষম হয়। অষ্ট্ৰেলিয়াৰ হৈ নাথান এলিছে ৩টা আৰু স্পেন্সাৰ জনছন তথা এডাম জাম্পাই দুটাকৈ উইকেট দখল কৰে।
জৱাবত ২৭২ ৰাণৰ লক্ষ্য অনুসৰণ কৰিবলৈ নামি অষ্ট্ৰেলিয়াই আৰম্ভণিতে বিপৰ্যয়ৰ সন্মুখীন হয়। ব্ৰেড ইভান্সে ইনিংচৰ প্ৰথমফালেই মাত্ৰ ২৫ ৰাণতে অষ্ট্ৰেলিয়াৰ দুটা গুৰুত্বপূৰ্ণ উইকেট পতনেৰে হেঁচা সৃষ্টি কৰিছিল। কিন্তু তাৰ পিছতে জশ ইংলিছে অত্যন্ত আকৰ্ষণীয় বেটিঙেৰে খেলি ১০২ টা বলতে ১০৩ ৰাণৰ এক আকৰ্ষণীয় শতক অৰ্জন কৰে। তেওঁক সংগ দিয়ে আলেক্স কেৰীয়ে, যি ৩০ বলতে ৩৪ ৰাণ সংগ্ৰহ কৰে।
মেচখনৰ শেষৰ পিনে জিম্বাব্য়েৰ বলাৰসকলে পুনৰ ঘূৰি আহি অষ্ট্ৰেলিয়া শিবিৰত কম্পন সৃষ্টি কৰে। ব্ৰেড ইভান্সে ৪৭ ৰাণৰ বিনিময়ত ৪ টা উইকেট দখল কৰি অষ্ট্ৰেলিয়াৰ বেটিং লাইনআপ ধস নমাই দিয়ে। ২৪৫ ৰাণতে অষ্ট্ৰেলিয়াই নিজৰ ৯ টা উইকেট হেৰুৱাই পৰাজয়ৰ মুখলৈ ঠেলি পৰিছিল। জয়ৰ বাবে ২৮ বলত ২৭ ৰাণৰ প্ৰয়োজন হোৱাৰ সময়ত ক্ৰিজত উপস্থিত থকা নাথান এলিছ আৰু স্পেন্সাৰ জনছনৰ যুঁজাৰু মনোভাৱে মেচখনৰ গতি সলনি কৰি পেলায়।
অন্তিম অভাৰত জয়ৰ বাবে ৯ ৰাণৰ প্ৰয়োজন থকা অৱস্থাত নাথান এলিছে প্ৰথম বলটোতেই ছিক্স কোবায় আৰু পিছত পঞ্চম বলটোত বিজয়ী একক ৰাণ সংগ্ৰহ কৰি অষ্ট্ৰেলিয়াক ঐতিহাসিক আৰু নাটকীয় জয়ৰ সোৱাদ দিয়ে। নাথান এলিছে ৪৪ বলত অপৰাজিত ৩৬ ৰাণৰ এক গুৰুত্বপূৰ্ণ ইনিংচ খেলি দলক জয়ৰ বালিচৰলৈ কঢ়িয়াই লৈ যায়। এই ৰোমাঞ্চকৰ জয়েৰে অষ্ট্ৰেলিয়াই জিম্বাব্য়ে ভ্ৰমণ সফলভাৱে সমাপ্ত কৰে।
