গুৱাহাটী: অসমবাসীক ভয়ানক বান পৰিস্থিতিৰ পৰা উদ্ধাৰ কৰি দ্ৰুতগতিত স্বাভাৱিক অৱস্থালৈ ঘূৰাই আনিবলৈ দেশৰ বিভিন্ন প্ৰান্তৰ পৰা সহায়ৰ হাত আগবঢ়োৱা হৈছে। শেহতীয়াকৈ ঝাৰখণ্ড চৰকাৰে মুখ্যমন্ত্ৰী সাহায্য পুঁজিলৈ আৰ্থিক অনুদান আগবঢ়োৱাৰ পিছত, সোমবাৰে ছত্তীশগড় চৰকাৰেও অসমৰ বান সাহায্যৰ বাবে আগবাঢ়ি আহে। ছত্তীশগড় চৰকাৰে ৰাজ্যখনৰ বানাক্ৰান্তসকলৰ বাবে সঁহাৰি জনাই ৫ কোটি টকাৰ এক বৃহৎ আৰ্থিক সাহাৰ্য ঘোষণা কৰে।
অসমৰ এই দুৰ্যোগপূৰ্ণ আৰু কঠিন সময়ত ছত্তীশগড় চৰকাৰে দেখুওৱা এই উদাৰতা তথা সংবেদনশীলতাৰ বাবে অসমৰ মুখ্যমন্ত্ৰী ডঃ হিমন্ত বিশ্ব শৰ্মাই সামাজিক মাধ্যমৰ জৰিয়তে গভীৰ ধন্যবাদ আৰু কৃতজ্ঞতা জ্ঞাপন কৰিছে।
ছত্তীশগড়ৰ মুখ্যমন্ত্ৰী বিষ্ণু দেও ছায়ে শেহতীয়াকৈ টেলিফোনযোগে অসমৰ মুখ্যমন্ত্ৰী ডঃ হিমন্ত বিশ্ব শৰ্মাক যোগাযোগ কৰি ৰাজ্যখনৰ বান পৰিস্থিতিৰ বুজ লৈছিল। ইয়াৰ পিছতে ছত্তীশগড় চৰকাৰে ঘোষণা কৰা এই সাহায্যৰ সন্দৰ্ভত সামাজিক মাধ্যমত মুখ্যমন্ত্ৰী ডঃ শৰ্মাই উল্লেখ কৰে যে, এই সহযোগী পদক্ষেপে কেৱল বান সাহায্যকে নুবুজায়, বৰঞ্চ অসম আৰু ছত্তীশগড়ৰ মাজৰ এক সুদৃঢ় তথা অটুট সম্পৰ্ককো প্ৰতিফলিত কৰিছে।
উল্লেখ্য যে, ৰাজ্যৰ কেইবাখনো জিলাত বানৰ তাণ্ডৱে চলাই থকা ভয়াৱহ পৰিস্থিতিৰ মাজতে দেশৰ বিভিন্ন ৰাজ্য আৰু কেন্দ্ৰীয় পৰ্যায়ৰ পৰা অহা এনে সহাঁৰিয়ে বানপীড়িতসকলৰ পুনৰাসংস্থাপন আৰু সাহাৰ্য বিতৰণৰ কাম-কাজ খৰটকীয়া কৰাত গুৰুত্বপূৰ্ণ ভূমিকা পালন কৰিব বুলি আশা কৰা হৈছে।
