গ্লাছগোত অনুষ্ঠিত হৈ থকা কমনৱেল্থ গেমছ ২০২৬ (CWG 2026) ত ভাৰতে জ’ভলিন থ্ৰ’ ইভেণ্টত এক স্মৰণীয় ডাবল পডিয়াম ফিনিছ অৰ্জন কৰিছে। দেশৰ তাৰকা এথলেট তথা অলিম্পিক চেম্পিয়ন নীৰজ চোপ্ৰাই প্ৰতিকূল বতৰৰ মাজতো নিজৰ শ্ৰেষ্ঠ প্ৰদৰ্শন আগবঢ়াই ৰূপৰ পদক দখল কৰাৰ বিপৰীতে, যুৱ এথলেট যশবীৰ সিঙে নিজৰ অন্তিম প্ৰচেষ্টাত চমক সৃষ্টি কৰি ব্ৰঞ্জৰ পদক নিজৰ নামত খোদিত কৰে।
২৮ বছৰীয়া নীৰজ চোপ্ৰাই তেওঁৰ দ্বিতীয় প্ৰচেষ্টাত ৮৫.৮৩ মিটাৰ দূৰত্বলৈ জ’ভলিন থ্ৰ' কৰি এই ছিজনৰ সৰ্বশ্ৰেষ্ঠ প্ৰদৰ্শন দাঙি ধৰে। আঘাতৰ সমস্যাৰ পৰা সুস্থ হৈ উঠাৰ পিছত এয়া তেওঁৰ এক সন্তুষ্টিদায়ক প্ৰত্যাৱৰ্তন বুলি বিবেচিত হৈছে। ইফালে, প্ৰথমবাৰৰ বাবে কমনৱেল্থ গেমছত অংশগ্ৰহণ কৰা ২৪ বছৰীয়া যশবীৰ সিঙে নিজৰ ষষ্ঠ তথা অন্তিম প্ৰচেষ্টাত ৮৫.৪১ মিটাৰৰ ব্যক্তিগত শ্ৰেষ্ঠ থ্ৰ' প্ৰদৰ্শন কৰি সকলোকে আচৰিত কৰি তোলে আৰু পডিয়ামৰ তৃতীয় স্থান দখল কৰে।
এই প্ৰতিযোগিতাত শ্ৰীলংকাৰ তাৰকা ৰুমেশ থৰংগা পাথিৰাজে ৮৯.৭৫ মিটাৰ থ্ৰ'ৰে স্বৰ্ণ পদক অৰ্জন কৰিবলৈ সক্ষম হয়। প্ৰচণ্ড ঠাণ্ডা আৰু বতাহৰ বিপৰীত পৰিস্থিতিৰ মাজতো ভাৰতীয় এথলেট দুগৰাকীয়ে একেলগে পডিয়ামত স্থান দখল কৰাত সমগ্ৰ দেশবাসীয়ে আনন্দ প্ৰকাশ কৰিছে। ইয়াৰ পূৰ্বে ২০১৮ চনৰ গোল্ড কোষ্ট কমনৱেল্থ গেমছতো নীৰজে সোণৰ পদক লাভ কৰিছিল।
পদক জয়ৰ পিছত সংবাদ মাধ্যমৰ সৈতে কথা পাতি নীৰজ চোপ্ৰাই কয় যে যশবীৰৰ সৈতে একেলগে পডিয়াম ভাগবত কৰাটো তেওঁৰ বাবে এক অত্যন্ত গৌৰৱৰ বিষয়, যিয়ে তেওঁক এছিয়ান গেমছৰ পুৰণি স্মৃতি সোঁৱৰাই দিছে। এই ঐতিহাসিক সফলতাই ভাৰতীয় এথলেটিকছৰ উজ্জ্বল ভৱিষ্যতকে প্ৰতিফলিত কৰিছে।
