নতুনদিল্লী/পেৰিছ: জলবায়ু পৰিৱৰ্তনৰ ভয়াৱহ প্ৰভাৱ আৰু তীব্ৰ গ্ৰীষ্মপ্ৰৱাহৰ বাবে বৰ্তমান ইউৰোপজুৰি সৃষ্টি হৈছে এক অভূতপূৰ্ব পৰিস্থিতি। ফ্ৰান্স, স্পেইনকে ধৰি ইউৰোপৰ বিভিন্ন দেশত ভয়ংকৰ দাবানলে বিধ্বংসী ৰূপ ধাৰণ কৰিছে। ৰেকৰ্ড ভংগকাৰী উত্তাপ আৰু দীৰ্ঘদিনীয়া খৰাঙৰ ফলত শুকাই যোৱা গছ-গছনি আৰু বনভূমি এই দাবানলৰ ইন্ধন হৈ পৰিছে, যাৰ ফলত সমগ্ৰ মহাদেশখনতে এক হাহাকাৰ পৰিস্থিতিৰ সৃষ্টি হৈছে।
প্ৰাপ্ত তথ্য অনুসৰি, বৰ্তমানলৈকে ইউৰোপৰ লক্ষাধিক লোকক সুৰক্ষিত স্থানলৈ স্থানান্তৰিত কৰা হৈছে। ফ্ৰান্সৰ দক্ষিণ-পশ্চিম অংশৰ বৰ্ডো (Bordeaux) চহৰৰ নিকটৱৰ্তী জিৰোণ্ড (Gironde) অঞ্চলত পৰিস্থিতি অতিশয় সংকটজনক হৈ পৰিছে। যুদ্ধকালীন অৱস্থাৰ প্ৰতি লক্ষ্য ৰহি ফ্ৰান্সত বিগত কেইবা দশকৰ ভিতৰতে সৰ্ববৃহৎ জনবহুল স্থানান্তৰ অভিযান চলোৱা হৈছে। এই ভয়াবহ জুইৰ লেলিহান শিখাই দেশখনৰ লাখ লাখ হেক্টৰ বনভূমি ইতিমধ্যে ছাই কৰি পেলাইছে।
ফ্ৰান্সৰ কাষতে লাগি থকা স্পেইনতো একেই ভয়াৱহ ছবি দেখা গৈছে। মেট্ৰিড আৰু আভিলা (Ávila) অঞ্চলৰ পৰা হাজাৰ লোকক ঘৰবাৰী এৰি নিৰাপদ আশ্ৰয় শিবিৰলৈ যাবলৈ বাধ্য কৰোৱা হৈছে। স্পেইনৰ প্ৰধানমন্ত্ৰী পেড্ৰ' ছানচেজে (Pedro Sánchez) এই জলবায়ু সংকটক গুৰুত্বসহকাৰে লৈ নাগৰিকসকলক সতৰ্ক হৈ থাকিবলৈ আহ্বান জনাইছে আৰু সতৰ্কবাণী উচ্চাৰণ কৰিছে যে আহি থকা দিনবোৰত পৰিস্থিতি আৰু অধিক কঠিন হৈ পৰিব পাৰে।
ইউৰোপীয় পৰিৱেশ সংস্থাৰ (EEA) বিজ্ঞানীসকলৰ মতে, বঢ়ি যোৱা কাৰ্বন নিঃসৰণ আৰু গোলকীয় উষ্ণতাৰ বাবেই এই চৰম বতৰৰ পৰিঘটনা বৃদ্ধি পাইছে। ইফালে, পৰিস্থিতি নিয়ন্ত্ৰণ কৰিবলৈ হাজাৰ হাজাৰ অগ্নিনিৰ্বাপক বাহিনীৰ জোৱান, সেনা আৰু উদ্ধাৰকাৰী দল দিন-ৰাতি একাকাৰ কৰি সংগ্ৰাম অব্যাহত ৰাখিছে যদিও বতৰৰ প্ৰতিকূল অৱস্থাৰ বাবে জুই নিয়ন্ত্রণ কৰা অত্যন্ত কঠিন হৈ পৰিছে। এই ভয়ংকৰ প্ৰাকৃতিক দুৰ্যোগে ইউৰোপীয় দেশসমূহৰ পৰিৱেশ নীতি আৰু জলবায়ু পৰিৱৰ্তনৰ সৈতে মোকাবিলা কৰাৰ প্ৰস্তুতিত এক ডাঙৰ প্ৰত্যাহ্বান সৃষ্টি কৰিছে।
