গুৱাহাটী: প্ৰলয়ংকৰী বানে কেৱল মানুহৰ ঘৰ-বাৰী আৰু খেতি-পথাৰেই ধ্বংস কৰা নাই, বহু ছাত্ৰ-ছাত্ৰীৰ ভৱিষ্যতৰ শৈক্ষিক নথি-পত্ৰবোৰো চোৰাং সোঁতে লৈ গ’ল। এই পৰিস্থিতিক মধ্যনজৰত ৰাখি অসম চৰকাৰে ৰাজ্যৰ বানাক্ৰান্ত ছাত্ৰ-ছাত্ৰীসকলৰ বাবে এক অতি গুৰুত্বপূৰ্ণ তথা সকাহজনক সিদ্ধান্ত গ্ৰহণ কৰিছে। শেহতীয়াকৈ ৰাজ্যৰ চাৰিখন জিলাৰ বানত সৰ্বস্বান্ত হোৱা শিক্ষাৰ্থীসকলক বিনামূলীয়াকৈ ডুপ্লিকেট শৈক্ষিক নথি-পত্ৰ যোগান ধৰাৰ বাবে চৰফালৰ পৰা আনুষ্ঠানিক জাননী জাৰি কৰা হৈছে।
প্ৰাপ্ত তথ্য অনুসৰি, চৰাইদেউ, শিৱসাগৰ, যোৰহাট আৰু গোলাঘাট জিলাৰ বানাক্ৰান্ত শিক্ষাৰ্থীসকল এই বিশেষ সুবিধাৰ অন্তৰ্ভুক্ত হ’ব। এই জিলাসমূহৰ যিসকল ছাত্ৰ-ছাত্ৰীৰ হাইস্কুল শিক্ষান্ত পৰীক্ষা (HSLC), হাই মাদ্ৰাছা পৰীক্ষা (AHM) বা উচ্চতৰ মাধ্যমিক চূড়ান্ত পৰীক্ষাৰ মূল প্ৰমাণ-পত্ৰ, মাৰ্কশ্বীট, এডমিট কাৰ্ড আৰু ৰেজিষ্ট্ৰেশ্যন কাৰ্ড আদি বানৰ পানী বা বোকা-পলসে নষ্ট কৰিছে, তেওঁলোকে একেবাৰে বিনামূলীয়াকৈ পুনৰ এই নথি সমূহ লাভ কৰিব পাৰিব।
মুখ্যমন্ত্ৰী ড° হিমন্ত বিশ্ব শৰ্মাই সামাজিক মাধ্যম ‘এক্স’ (X) যোগে এই কথা প্ৰকাশ কৰি কয় যে, “কালি ঘোষণা কৰা অনুসৰি চাৰিখন জিলাৰ বানপীড়িত ছাত্ৰ-ছাত্ৰীক ডুপ্লিকেট এডমিট কাৰ্ড, মাৰ্কশ্বীট আৰু অন্যান্য নথি-পত্ৰ বিনামূলীয়াকৈ প্ৰদানৰ বাবে অধিসূচনা জাৰি কৰা হৈছে।” ইয়াৰ লগতে ছাত্ৰ-ছাত্ৰীসকলৰ সুবিধাৰ্থে প্ৰক্ৰিয়াটো অতি সহজ কৰি তোলা হৈছে বুলি উল্লেখ কৰি তেওঁ কয় যে এই কামৰ বাবে কোনো ধৰণৰ আৰক্ষীৰ ৰিপ’ৰ্টৰ (Police Report) প্ৰয়োজন নাই, কেৱল এটি আত্মঘোষণাই (Self-declaration) যথেষ্ট হ’ব।
আনহাতে, শিক্ষামন্ত্ৰী ৰণোজ পেগুৱেও এই সন্দৰ্ভত বিশেষ সঁহাৰি জনাই কয় যে অসম ৰাজ্যিক বিদ্যালয় শিক্ষা সংসদ (ASSEB) আৰু উচ্চতৰ মাধ্যমিক শিক্ষা সংসদৰ (AHSEC) প’ৰ্টেলৰ জৰিয়তে ক্ষতিগ্ৰস্ত শিক্ষাৰ্থীসকলে অনলাইনযোগে আবেদন কৰিব পাৰিব। চৰকাৰৰ এই মানৱীয় পদক্ষেপে বানত সৰ্বস্বান্ত হৈ পৰা কেইবা হাজাৰো শিক্ষাৰ্থীৰ শিক্ষাজীৱনক পুনৰ সঠিক পথলৈ আনিবলৈ এক ডাঙৰ সাহস যোগাব বুলি আশা কৰা হৈছে।
অসমৰ বানাক্ৰান্ত ৪ জিলাৰ শিক্ষাৰ্থীৰ বাবে বিশেষ ঘোষণা! বানে নষ্ট কৰা মাৰ্কশ্বীট আৰু প্ৰমাণ-পত্ৰ এতিয়া বিনামূলীয়াকৈ পাব ডুপ্লিকেট কপি। পঢ়ক সম্পূৰ্ণ খবৰ।
