নতুন দিল্লী: অৰুণ জেটলী ষ্টেডিয়ামত অনুষ্ঠিত শৃংখলাৰ প্ৰথমখন টি-২০ আন্তঃৰাষ্ট্ৰীয় ক্ৰিকেট মেচত আফগানিস্তানৰ বিৰুদ্ধে এক চৰম আধিপত্য বিস্তাৰ কৰি ৭ উইকেটত জয়লাভ কৰিলে শক্তিশালী ভাৰতে। এই বিজয়ৰ জৰিয়তে শ্ৰেয়াছ আয়াৰৰ নেতৃত্বাধীন টীম ইণ্ডিয়াই তিনিখনীয়া টি-২০ শৃংখলাটোত ১-০ ৰ অগ্ৰগতি লাভ কৰিবলৈ সক্ষম হয়। অভিষেক শৰ্মাৰ বিস্ফোৰক বেটিং আৰু অৰশদীপ সিং আক্ৰমণাত্মক বলিঙে দলৰ জয়োমুখ মুকলি কৰাত মুখ্য ভূমিকা পালন কৰে।
ম্যাচত টছত জয়লাভ কৰি ভাৰতীয় অধিনায়ক শ্ৰেয়াছ আয়াৰে প্ৰথমে ফিল্ডিং কৰাৰ সিদ্ধান্ত লয়। ভাৰতীয় মাৰমুখী পেচ আক্রমণৰ সন্মুখত পৰি আফগানিস্তানৰ বেটিং লাইনআপটো তচনচ হৈ পৰে।
অৱশ্যে, ইয়াৰ পিছত আজমতুল্লাহ ওমৰজাই আৰু মহম্মদ নবীয়ে দায়িত্বশীল বেটিঙেৰে দলীয় ইনিংছক চম্ভালি লয়। ওমৰজায়ে অপৰাজিত ৬৪ (৪৪ বল) আৰু নবীয় ৩৩ ৰাণৰ বৰঙণি যোগাই আফগানিস্তানৰ স্ক’ৰ নিৰ্ধাৰিত ২০ অভাৰত ৮ উইকেটৰ বিনিময়ত ১৫৬ ৰাণলৈ কঢ়িয়াই লৈ যায়।
বিজয়ৰ বাবে ১৫৭ ৰাণৰ লক্ষ্য অনুসৰণ কৰিবলৈ আহি ভাৰতে আৰম্ভণিতে ছজু ছমচনৰ উইকেট (১০) সূলভভাৱে হেৰুৱাইছিল যদিও তাৰ পিছৰ দৃশ্যপট সম্পূৰ্ণ সলনি হৈ পৰে। বিস্ফোৰক বেটছমেন অভিষেক শৰ্মাই আফগানিস্তানৰ ব’লাৰসকলক আক্ৰমণৰ লক্ষ্য কৰি লয়। তেওঁ মাত্ৰ ২২ বলতে নিজৰ অৰ্ধশতক সম্পূৰ্ণ কৰে আৰু মাত্ৰ ৩২ বলতে ৭ টা বাউণ্ডাৰী আৰু ৭ টা গগনচুম্বী ছক্ৰৰ সহায়ত ৮২ ৰাণৰ এক খলকনি তোলা ইনিংছ খেলে।
তেওঁক সুন্দৰ সংগ দিয়ে ঈশান কিচানে, যিয়ে ৩৩ বলত ৪২ ৰাণৰ গুৰুত্বপূৰ্ণ অৱদান আগবঢ়ায়। দুয়োজনে দ্বিতীয় উইকেটৰ জুটিত ১২১ ৰাণ সংগ্ৰহ কৰি মেচখন ভাৰতৰ মুঠমুঠীলৈ লৈ আহে। অৱশেষত অভিষেক আউট হোৱাৰ পিছত অধিনায়ক শ্ৰেয়াছ আয়াৰ (৮*) আৰু তিলক বাৰ্মাই (৩*) দলক ১৩.৪ অভাৰতে ৩ উইকেটৰ বিনিময়ত ১৫৭ ৰাণত উপনীত কৰাই সহজ জয় নিশ্চিত কৰে।
