আমেৰিকা যুক্তৰাষ্ট্ৰৰ ভূ-তাত্ত্বিক জৰীপ সংস্থা (USGS) আৰু ইণ্ডোনেছিয়াৰ আব্য়ৱহাৰ, জলবায়ুবিজ্ঞান তথা ভূপদার্থ বিজ্ঞান সংস্থাই (BMKG) প্ৰকাশ কৰা মতে, ভূমিকম্পটোৰ কেন্দ্ৰস্থল আছিল পূব নুছা টেংগৰা প্ৰদেশৰ এণ্ডে চহৰৰ উত্তৰ-উত্তৰ-পশ্চিম দিশত আৰু গভীৰতা আছিল মাত্ৰ ১০ ৰ পৰা ১৫ কিলোমিটাৰ। এই ভূমিকম্পৰ লগে লগে ইণ্ডোনেছিয়াৰ প্ৰশাসনে উপকূলীয় অঞ্চলসমূহৰ বাবে ছুনামিৰ সতৰ্কবাণী জাৰী কৰে। বিশেষকৈ পূব নুছা টেংগৰা, পশ্চিম নুছা টেংগৰা আৰু দক্ষিণ ছুলাৱেছি প্ৰদেশত ছুনামিৰ ঢৌ উঠিব পাৰে বুলি সতৰ্ক কৰি দিয়া হৈছে।
ভূমিকম্পৰ প্ৰভাৱ ইমান বেছি আছিল যে ইয়াৰ ফলত কেইবাটাও অট্টালিকা আৰু গৃহ ক্ষতিগ্ৰস্ত হয়। সামাজিক মাধ্যমত ভাইৰেল হৈ পৰা দৃশ্যত দেখা গৈছে যে ছিক্কা ৰেজেনেন্সিৰ মাউমেৰে বন্দৰত এটা অট্টালিকাৰ একাংশ অংশ ধূলিসাৎ হৈ পৰিছে। ইফালে, এণ্ডে জিলাৰ এখন চিকিৎসালয়ৰ পৰাও ৰোগীসকলক সুৰক্ষিত স্থানলৈ স্থানান্তৰ কৰাৰ খবৰ পোৱা গৈছে। প্ৰথমবাৰ জোকাৰণিৰ পাছতে ৬.১ আৰু ৫.৯ প্ৰাবল্যৰ কেইবাটাও শক্তিশালী আফটাৰশ্বক (পৰৱৰ্তী কম্পন) অনুভৱ কৰা হয়।
উল্লেখ্য যে ইণ্ডোনেছিয়া বিশ্বৰ অন্যতম ভূমিকম্প প্ৰৱণ অঞ্চল হিচাপে পৰিচিত। প্ৰশান্ত মহাসাগৰীয় ‘ৰিং অৱ ফায়াৰ’ (Ring of Fire) বা অগ্নিবলয়ত অৱস্থিত হোৱাৰ বাবে এই দেশত সততে ডাঙৰ ডাঙৰ ভূমিকম্প আৰু আগ্নেয়গিৰিৰ উদগীৰণ ঘটে। ২০০৪ চনত ইণ্ডোনেছিয়াৰ সুমাত্ৰা উপকূলত সংঘটিত ৯.১ প্ৰাবল্যৰ এক ভয়ংকৰ ভূমিকম্প আৰু তাৰ পৰৱৰ্তী ছুনামিয়ে সমগ্ৰ বিশ্বতে ধ্বংসলীলা চলাইছিল। বৰ্তমানৰ এই পৰিস্থিতিত প্ৰশাসনে উপকূলৰ কাষৰীয়া লোকসকলক সাৱধানতা অৱলম্বন কৰিবলৈ আৰু নদী তথা সাগৰৰ তীৰৰ পৰা আঁতৰি সুৰক্ষিত উচ্চ স্থানলৈ গুচি যাবলৈ নিৰ্দেশ দিছে।
