আৰক্ষী সূত্ৰে প্ৰকাশ পোৱা মতে, চলিত বৰ্ষৰ ২৩ জুনত হুগলী জিলাৰ মগৰা থানাত ভুক্তভোগী যুৱতীগৰাকীয়ে পঞ্জীয়নভুক্ত কৰে এফ.আই.আৰ. (FIR)। অভিযোগ অনুসৰি, ২০২৩ চনত তেওঁলোকৰ পৰিচয় হৈছিল আৰু বিগত সাৰড়ে তিনি বছৰ ধৰি তেওঁলোকৰ সম্পৰ্ক আছিল। ভুক্তভোগীয়ে অভিযোগ কৰে যে অভিযুক্ত ক্ৰিকেটাৰগৰাকীয়ে তেওঁক বিয়াৰ প্ৰতিশ্ৰুতি দিছিল যদিও পাছত প্ৰতিশ্ৰুতি ভংগ কৰাৰ লগতে মাৰপিট আৰু প্ৰাণনাশৰ ভাবুকি প্ৰদান কৰে। লগতে তেওঁৰ সন্মতি অবিহনে ব্যক্তিগত মুহূৰ্তৰ ভিডিঅ' বা ছবি সংৰক্ষণ কৰি ব্লেমেইলিং কৰাৰো অভিযোগ উত্থাপিত হৈছে।
কলকাতা উচ্চ ন্যায়ালয়ৰ নিৰ্দেশ মৰফে সোমবাৰে নিশা আৰক্ষীয়ে তেওঁক গ্ৰেপ্তাৰ কৰে। ইয়াৰ পূৰ্বে ন্যায়াধীশ সৌগত ভট্টাচাৰ্যৰ আদালতে ক্ৰিকেটাৰগৰাকীক ক্ষিপ্ৰতাৰে গ্ৰেপ্তাৰ কৰিবলৈ আৰু তেওঁৰ সকলো ইলেক্ট্ৰনিক ডিভাইচ (লেপটপ, পেন ড্ৰাইভ আদি) জব্দ কৰিবলৈ নিৰ্দেশ দিছিল, যাতে আপত্তিজনক তথ্য শ্বেয়াৰ কৰিব নোৱাৰে।
মঙলবাৰে দিনজুৰি আইনী প্ৰক্ৰিয়া সম্পূৰ্ণ কৰাৰ অন্তত অভিষেক পোৰেলক চিনচুৰাৰ জিলা সত্ৰ আদালতে তিনিদিনীয়া আৰক্ষী জিম্মালৈ প্ৰেৰণ কৰে। হুগলী গ্ৰাম্য আৰক্ষী অধীক্ষক কুঁৱৰ ভূষণ সিঙে এই গ্ৰেপ্তাৰৰ কথা নিশ্চিত কৰি কয় যে আদালতৰ নিৰ্দেশ আৰু গোচৰৰ ভিত্তিত আইনগত কাৰ্যব্যৱস্থা অব্যাহত আছে।
উল্লেখ্য যে, অভিষেক পোৰেলে ঘৰুৱা ক্ৰিকেটত ব্ৰহ্মপুত্ৰ উপত্যকা বা বাংলাৰ হৈ উৎকৃষ্ট প্ৰদৰ্শন কৰাৰ লগতে আই পি এলত 'দিল্লী কেপিটেলছ' (Delhi Capitals) দলৰ হৈ গুৰুত্বপূৰ্ণ ভূমিকা পালন কৰিছিল। এই ঘটনাৰ পিছতে ক্ৰিকেট মহলত ব্যাপক চাঞ্চল্যৰ সৃষ্টি হৈছে।
