শেহতীয়াকৈ টাটা গ্ৰুপে ভাৰতীয় ছুপাৰ লীগৰ (ISL) পৰা জামছেদপুৰ এফচিৰ নাম স্থায়ীভাৱে প্ৰত্যাহাৰ কৰাৰ সিদ্ধান্ত লোৱাৰ পিছতে ক্ৰীড়াপ্ৰেমীসকলৰ মাজত তীব্ৰ প্ৰতিক্ৰিয়াৰ সৃষ্টি হৈছিল। যদিও টাটা গ্ৰুপে পূৰ্বৰ সিদ্ধান্তত অটল আছিল, কিন্তু তেওঁলোকে নিশ্চিত কৰিছে যে ক্লাবটোৱে যাতে টুৰ্ণামেণ্টত অংশগ্ৰহণ অব্যাহত ৰাখিব পাৰে, তাৰ বাবে গ’ৱাৰ আগশাৰীৰ ক্লাব চাৰ্চিল ব্ৰাদাৰ্ছৰ হাতত সমগ্ৰ মালিকত্ব তুলি দিয়া হৈছে।
এই চুক্তিমমৰ্মে টাটা ষ্টীল আৰু চাৰ্চিল ব্ৰাদাৰ্ছ ফুটবল ক্লাবৰ মাজত এখন শেয়াৰ ক্ৰয় চুক্তি স্বাক্ষৰিত হৈছে। সৰ্বভাৰতীয় ফুটবল ফেডাৰেচনৰ (AIFF) নিয়ম আৰু নীতি নিৰ্দেশনা অনুসৰি এই স্থানান্তৰ প্ৰক্ৰিয়া সম্পূৰ্ণ কৰা হৈছে। এই চুক্তির জৰিয়তে ভাৰতীয় ছুপাৰ লীগৰ (ISL) অফিচিয়েল লাইচেন্সৰ লগতে ক্লাবটোৰ ১২ গৰাকী ফুটবল খেলুৱৈ আৰু ২ গৰাকী প্ৰশিক্ষকৰ চুক্তিও চাৰ্চিল ব্ৰাদাৰ্ছলৈ হস্তান্তৰ কৰা হৈছে। আহি থকা ছেপ্টেম্বৰ মাহৰ পৰা চাৰ্চিল ব্ৰাদাৰ্ছে এই সকলোবোৰ দায়িত্ব গ্ৰহণ কৰিব।
উল্লেখ্য যে, চাৰ্চিল ব্ৰাদাৰ্ছে বিগত চাৰি দশক ধৰি ভাৰতীয় ফুটবলৰ ঐতিহ্য আৰু গৌৰৱ অক্ষুণ্ণ ৰাখি আহিছে। ইয়াৰ উপৰি ক্লাবটোৱে দুবাৰকৈ আই-লীগ খিতাপো দখল কৰিবলৈ সক্ষম হৈছিল। সকলো দিশ বিবেচনা কৰিয়েই টাটা ষ্টীলে এই ঐতিহাসিক চুক্তি সম্পন্ন কৰিছে।
টাটা ষ্টীলৰ শীর্ষ কর্মকর্তা ডি বি সুন্দৰা ৰামামে এই চুক্তি সন্দৰ্ভত প্ৰকাশ কৰি কয় যে, ভাৰতীয় ফুটবলৰ ইতিহাসৰ সৈতে চাৰ্চিল ব্ৰাদাৰ্ছৰ নাম ওতঃপ্রোতভাৱে জড়িত হৈ আছে। তেওঁ লগতে আশা প্ৰকাশ কৰে যে এই চুক্তিৰ জৰিয়তে তেওঁলোকৰ খেলুৱৈ আৰু প্ৰশিক্ষকসকলে পুনৰ আগশাৰীৰ ক্লাব ফুটবলত অংশগ্ৰহণৰ সুন্দৰ সুযোগ লাভ কৰিব।
