দেশখনৰ নাগৰিক সুৰক্ষা ইউনিট (Civil Protection Unit) জানিবলৈ দিয়া মতে, দুৰ্ঘটনাগ্ৰস্ত নাওখনত ইয়াৰ নিৰ্ধাৰিত কঢ়িয়াই নিব পৰা ক্ষমতাৰ তুুলনাত অতিৰিক্ত যাত্ৰী আছিল। নাওখনত মুঠ ৯০ জন যাত্ৰী কঢ়িওৱাৰ ক্ষমতা আছিল যদিও টিকট বিক্ৰীৰ তথ্য অনুসৰি তাত ১১৪ গৰাকী প্ৰাপ্তবয়স্ক যাত্ৰী আৰু ৫ জন কৰ্মচাৰী আছিল। ইয়াৰোপৰি, টিকট কিনিব নোৱাৰা কেইগৰাকীমান শিশুও নাওখনত আছিল বুলি অনুমান কৰা হৈছে, যাৰ সঠিক হিচাপ এতিয়াও পোৱা হোৱা নাই।
প্ৰতিবেদন অনুসৰি, দুৰ্যোগৰ পিছত ৭৭ জন লোকক সুৰক্ষিতভাৱে উদ্ধাৰ কৰি হ্ৰদটোৰ এটা সৰু দ্বীপলৈ লৈ যোৱা হয়। স্থানীয় সাংসদ মুটচা মুৰম্বেদজিয়ে ছচিয়েল মিডিয়াত এটা ভিডিঅ' শ্বেয়াৰ কৰিছে, য'ত যাত্ৰীসকলে যাত্ৰা আৰম্ভ কৰাৰ সময়ত তীৰৰ পৰা হাত জোকাৰি বিদায় লোৱা দেখা গৈছিল। লগতে, হ্ৰদৰ তীব্ৰ ঢৌ আৰু প্ৰবল বতাহৰ মাজত নাওখনে এই যাত্ৰা সম্পূৰ্ণ কৰিব পাৰিবনে নাই সেই লৈ স্থানীয় লোকসকল চিন্তিত হৈ পৰিছিল।
খবৰ পোৱাৰ লগে লগে জিমাবাৱে আৰক্ষী আৰু প্ৰশাসনৰ তৰফৰ পৰা ক্ষিপ্ৰতাৰে উদ্ধাৰ অভিযান আৰম্ভ কৰা হয়। ৰাজ্যিক সম্প্ৰচাৰক ZBC-ৰ ফুটেজত দেখা গৈছে যে স্পীডবটসমূহ দুৰ্ঘটনাগ্ৰস্ত নাওখনৰ দিশে আগবাঢ়ি গৈছে আৰু আকাশত হেলিকক্ট্ৰে টহল দি আছে।
উল্লেখ্য যে, দক্ষিণ আফ্ৰিকাৰ কাৰিব়া হ্ৰদ হৈছে বিশ্বৰ সৰ্ববৃহৎ মানৱসৃষ্ট হ্ৰদ, যিটো জিমাবাৱে আৰু জাম্বিয়াৰ সীমান্তত অৱস্থিত। এই শোকাৱহ দুৰ্ঘটনাৰ পিছত এতিয়া নিৰাপত্তা ব্যৱস্থা আৰু যাত্ৰী কঢ়িওৱাৰ নিয়ম উলংঘনৰ বিষয়টোক লৈ তীব্ৰ প্ৰতিক্ৰিয়াৰ সৃষ্টি হৈছে। উদ্ধাৰকাৰী দলসমূহে নিখোঁজ লোকসকলক বিচাৰি হ্ৰদৰ পানীত তন্নতন্নকৈ অভিযান চলাই আছে।
