সোণাপুৰ — সোণাপুৰত সংঘটিত হৈছে এক অতি হৃদয়বিদাৰক ঘটনা। বৃহস্পতিবাৰে বিয়লি ধুমুহা-বৰষুণৰ সময়ত হোৱা শক্তিশালী বজ্ৰপাতৰ ফলত উৎপল তুমুং (২২) নামৰ এজন মেধাৱী যুৱকৰ থিতাতে অকাল মৃত্যু ঘটে। এই ভয়াৱহ দুৰ্ঘটনাত যুৱকজনৰ মাতৃ কণিকা ৰাহাঙো গুৰুতৰভাৱে আহত হয়।
মৃত উৎপল সোণাপুৰৰ ২ নং আপৰীকুলাৰ চৰকাৰী গাঁওবুঢ়া কমলা তুমুঙৰ একমাত্ৰ পুত্ৰ আছিল।
কেনেকৈ ঘটিল এই ঘটনা?
প্ৰাপ্ত তথ্য অনুসৰি, বিয়লি খেতিপথাৰৰ কাম সামৰি উৎপলে মাতৃৰ সৈতে ঘৰলৈ উভতি আহি থকা অৱস্থাতে হঠাৎ প্ৰচণ্ড শব্দৰে বজ্ৰপাত হয়। বজ্ৰৰ আঘাতত থিতাতে উৎপলৰ প্ৰাণহানি ঘটে। স্থানীয় ৰাইজে আঘাতপ্ৰাপ্ত মাতৃ কণিকাক ততালিকে উদ্ধাৰ কৰি সোণাপুৰ জিলা চিকিৎসালয়ত ভৰ্তি কৰায়। সম্প্ৰতি তেওঁ চিকিৎসাধীন হৈ আছে।
এপিএছচি প্ৰাৰ্থী আছিল উৎপল
চলিত বৰ্ষতে সোণাপুৰ মহাবিদ্যালয়ৰ পৰা স্নাতক ডিগ্ৰী লাভ কৰা উৎপলে ভৱিষ্যতে এজন প্ৰশাসনিক বিষয়া হোৱাৰ লক্ষ্যৰে অতি নিষ্ঠাৰে এপিএছচি (APSC) পৰীক্ষাৰ বাবে প্ৰস্তুতি চলাই আছিল। শান্ত আৰু মেধাৱী যুৱকজনৰ এনে হঠাট মৃত্যুত সমগ্ৰ অঞ্চলটোতে শোকৰ ছাঁ পৰিছে।
উৎপলৰ মৃত্যুত সদৌ তিৱা ছাত্ৰ সংন্থাই গভীৰ দুখ প্ৰকাশ কৰি শোকসন্তপ্ত পৰিয়াললৈ সমবেদনা জনাইছে। ইফালে, পৰৱৰ্তী সময়ত এনে অনাকাংক্ষিত দুৰ্ঘটনা পৰিহাৰ কৰিবলৈ বাৰিষাৰ সময়ত পথাৰলৈ যোৱা লোকসকলক বিশেষ সাৱধানতা অৱলম্বন কৰিবলৈ আহ্বান জনাইছে মৃত উৎপলৰ পিতৃ কমলা তুমুঙে।
