ৰায়পুৰ জিলা গ্ৰাহক বিবাদ প্ৰতিকাৰ আয়োগে (District Consumer Disputes Redressal Commission) গ্ৰাহকৰ বাহন সলনি কৰি নতুন E20-অনুকূল বাহন দিবলৈ বা গাড়ীৰ সম্পূৰ্ণ মূল্য ঘূৰাই দিবলৈ মাৰুতি চুজুকিক নিৰ্দেশ দিছিল। ইয়াৰোপৰি গ্ৰাহকগৰাকীক মানসিক হাৰাশাস্তিৰ বাবে ক্ষতিপূৰ্ণ প্ৰদানৰো নিৰ্দেশনা জাৰি কৰা হৈছিল।
অৱশ্যে এই সন্দৰ্ভত প্ৰতিক্ৰিয়া প্ৰকাশ কৰি মাৰুতি চুজুকি ইণ্ডিয়াই স্পষ্ট কৰি দিয়ে যে তেওঁলোকৰ বাহনখন সম্পূৰ্ণৰূপে E20 ইন্ধন ব্যৱহাৰৰ বাবে উপযোগী আছিল আৰু এই কথা গ্ৰাহকৰ মেনুৱেলতো স্পষ্টভাৱে উল্লেখ আছিল। কোম্পানীটোৰ দাবী অনুযায়ী, গ্ৰাহকৰ বাহনৰ পৰা সংগ্ৰহ কৰা ইন্ধনত ভেজাল বা দূষিত হোৱাৰ স্পষ্ট প্ৰমাণ পোৱা গৈছে। ইয়াৰোপৰি ৰায়দানত কেইবাখনো গুৰুত্বপূৰ্ণ তথ্য সঠিকভাৱে প্ৰতিফলিত হোৱা নাই বুলি কোম্পানীটোৱে অভিযোগ তোলে।
আইনগত প্ৰক্ৰিয়া অনুসৰি গ্ৰাহক আদালতৰ এই নিৰ্দেশক উপযুক্ত উচ্চ পৰ্যায়ৰ ফ’ৰামত প্ৰত্যাহ্বান জনোৱা হ’ব বুলি মাৰুতি চুজুকিয়ে আনুষ্ঠানিকভাৱে প্ৰকাশ কৰিছে। গ্ৰাহকৰ সন্তুষ্টি, সুৰক্ষা আৰু উন্নত ইঞ্জিন প্ৰযুক্তিৰ প্ৰতি তেওঁলোক সম্পূৰ্ণ প্ৰতিশ্ৰুতিবদ্ধ বুলিও প্ৰতিষ্ঠানটোৱে নিজৰ বিবৃতিত উল্লেখ কৰে। কেন্দ্ৰীয় চৰকাৰে পেট্ৰ’লত ইথানলৰ পৰিমাণ বৃদ্ধি কৰাৰ দিশে আগবঢ়াৰ সময়তে এই গোচৰটোৱে দেশৰ অটোমোবাইল খণ্ডত এক বিশেষ চৰ্চা লাভ কৰিছে।
