নতুন দিল্লী/টেক ডেস্ক: কৃতিম বুদ্ধিমত্তা বা AI প্ৰতিষ্ঠান OpenAI-এ তেওঁলোকৰ ChatGPT-ৰ ডেস্কটপ এপৰ বাবে এটি সম্পূৰ্ণ নতুন আৰু আকৰ্ষণীয় ফিচাৰ মুকলি কৰিছে। ‘Pets’ নামৰ এই ফিচাৰটোৰ জৰিয়তে ব্যৱহাৰকাৰীসকলে এতিয়া কম্পিউটাৰ স্ক্ৰীণত অন্যান্য উইণ্ডোৰ ওপৰত ওপঙি থকা এটি সৰু এনিমেটেড সংগীৰ (animated companion) সহায়ত চাট আৰম্ভ কৰিব পাৰিব আৰু নিৰ্দিষ্ট কামসমূহ ট্ৰেক কৰিব পাৰিব।
প্ৰথম অৱস্থাত এই বছৰৰ মে' মাহত মুকলি কৰা এই ফিচাৰটোত ছেপ্টেম্বৰ মাহত ‘Quick Chat’ কাৰ্য্যনালীও সংযোজন কৰা হৈছে। ইয়াৰ ফলত ব্যৱহাৰকাৰীসকলে মূল ChatGPT ৱিন্ডো খুলি নোলোৱাকৈয়ে কেৱল চৰিত্ৰটোৰ তলত থকা এটা সৰু ইনপুট বক্সত টাইপ কৰি বা মুখেৰে ক’ৈ কাম কৰিব পাৰে।
এই ‘Pets’ ফিচাৰটো আচলতে কি?
এই পেটস বা চৰিত্ৰবোৰ কেৱল দেখাত সুন্দৰেই নহয়, ই কার্যকৰীভাৱে সহায়ো কৰে। আপুনি যেতিয়া অন্যান্য এপ্লিকেচনত কাম কৰি থাকিব, তেতিয়া এই চৰিত্ৰটোৱে ChatGPT-য়ে কোনো অনুৰোধ প্ৰক্ৰিয়াকৰণ কৰি আছে নে নাই, উত্তৰলৈ অপেক্ষা কৰি আছে নে কাম সম্পূৰ্ণ কৰিছে— সেই বিষয়ে ৰিয়েল-টাইম আপডেট দি থাকিব।
যদি কোনো ব্যৱহাৰকাৰীয়ে এই এনিমেটেড পেট বা চৰিত্ৰটো আমোদদায়ক বুলি নাভাৱে, তেওঁলোকৰ বাবে ‘Mini’ বিকল্পো উপলব্ধ কৰা হৈছে।
কেনেকৈ ছেটআপ কৰিব এই ফিচাৰ?
আপুনি অতি সহজ কেইটামান পদক্ষেপেৰে ChatGPT ডেস্কটপ এপটোত এই ফিচাৰ সক্ৰিয় কৰিব পাৰিব:
প্ৰথমে আপোনাৰ কম্পিউটাৰৰ ChatGPT desktop app টো খোলক।
তাৰ পিছত এপটোৰ Settings লৈ যাওক।
ইয়াৰ পৰা Pets খণ্ডটো নিৰ্বাচন কৰক আৰু আপোনাৰ পচন্দৰ পেট চৰিত্ৰটো বা Mini বিকল্পটো বাছি লওক।
স্ক্ৰীণত চৰিত্ৰটো আনিবলৈ ইনপুট বক্সত
/petটাইপ কৰক বা নিৰ্দেশনা মেনুৰ পৰা Show pet বিকল্পটো বাছি লওক।
ইয়াৰ উপৰি মেক (Mac) ব্যৱহাৰকাৰীসকলে Option + Space আৰু উইণ্ডোজ (Windows) ব্যৱহাৰকাৰীসকলে Windows + Alt + P শ্বৰ্টকাট কি’ ব্যৱহাৰ কৰিও এই পেট চৰিত্ৰটো স্ক্ৰীণলৈ আনিব পাৰে।
