খাদ্যৰ পেকেটৰ তাৰিখ পাৰ হ'লেই পেলাই নিদিব! বিশেষজ্ঞৰ পৰা জানক 'Best Before' আৰু 'Expiry Date'ৰ প্ৰকৃত অৰ্থ
যদি আপুনি কেতিয়াবা কেৱল পেকেটৰ তাৰিখ উকলি যোৱাৰ বাবেই গাখীৰৰ পেকেট বা দধিৰ টেটু আৱৰ্জনাৰ বাকচত পেলাই দিছে, তেন্তে আপুনি অকলে নহয়। পেকেটত ছপা কৰা তাৰিখটো পাৰ হৈ যোৱাৰ মাত্ৰেই বহু মানুহেই খাদ্যবস্তু পেলাই দিয়ে। কিন্তু বিশেষজ্ঞসকলৰ মতে, ইয়াৰে অধিকাংশই খোৱাৰ বাবে এতিয়াও সম্পূৰ্ণ উপযোগী হৈ থাকে।
শিশুৰ ফমূৰ্ডা (Baby Formula) বাদে খাদ্যৰ তাৰিখৰ বাবে কোনো কেন্দ্ৰীয় বা একপ্ৰকাৰৰ মানক নিয়ম নথকাৰ বাবে "Best Before," "Best By," আৰু "Best If Used By" আদি শব্দবোৰৰ অৰ্থ বুজি পোৱাটো কঠিন হৈ পৰিছে। বেছিভাগ মানুহেই এই কথাটো নাভাৱে যে এই লেবেলবোৰ খাদ্য সুৰক্ষিতনে নহয় তাৰ ওপৰত নহয়, বৰং খাদ্যখিনো কিমান সতেজ তাৰ ওপৰতহে নিৰ্ভৰ কৰে।
আমেৰিকা যুক্তৰাষ্ট্ৰৰ জনহপকিন্স ব্লুমবার্গ স্কুল অৱ পাবলিক হেল্থৰ ২০১৯ চনৰ এক অধ্যয়ন অনুসৰি, কেৱল আমেৰিকাতে ৮০% তকৈ অধিক গ্ৰাহকে পেকেটত দিয়া তাৰিখ চপাবলৈ অহাৰ লগে লগে খাদ্য পেলাই দিয়ে।
ৰাটগাৰ্জ বিশ্ববিদ্যালয়ৰ খাদ্য সুৰক্ষা বিশেষজ্ঞ ডোনাল্ড স্কাফনাৰে (Donald Schaffner) কয়, "এই তাৰিখৰ লেবেলসমূহে কেৱল নিৰ্দিষ্ট সময়লৈকে গুণগত মানৰ গেৰান্টি দিয়ে। ই কোনো সামগ্ৰীৰ সুৰক্ষাৰ সৈতে জড়িত নহয়।"
খাদ্যৰ তাৰিখৰ লেবেলসমূহ প্ৰতিখন ৰাজ্য অনুসৰি ভিন্ন হয় আৰু ইয়াক খাদ্য নিৰ্মাতা কোম্পানীসমূহে নিৰ্ধাৰণ কৰে। মেৰিলেণ্ড বিশ্ববিদ্যালয়ৰ গৱেষকসকলৰ মতে, আমেৰিকাত ৫০ তকৈও অধিক ভিন্ন ধৰণৰ তাৰিখৰ লেবেল ব্যৱহাৰ কৰা হয়।
চান ফ্ৰান্সিছকো বে এৰিয়াৰ খাদ্য বৈজ্ঞানিক ৰচেল জেমছাৰে (Rachel Zemser) কয়, "এই লেবেলসমূহ নিৰ্মাতা কোম্পানীয়ে সামগ্ৰীবিধ কেতিয়া আটাইতকৈ সোৱাদযুক্ত হ'ব বা কেতিয়া ইয়াৰ গুণগত মান শীৰ্ষ পৰ্যায়ত থাকিব বুলি ভাবে, তাৰ ওপৰতে ভিত্তি কৰি তৈয়াৰ কৰে।"
দীৰ্ঘদিন ধৰি সুৰক্ষিত হৈ থকা খাদ্য:
যিকোনো খোলা নোহোৱা টিনৰ খাদ্য যেনিবা – বীন, টমেটো, ফলমূল, শাক-পাচলী আৰু তৰল পদাৰ্থত পেক কৰা সুৰক্ষিত খাদ্য লেবেলত ছপা কৰা তাৰিখৰ কেইবা বছৰৰ পিছতো ভাল হৈ থাকে। ছয়া গাখীৰ বা বাদাম গাখীৰৰ বাকচৰ ক্ষেত্ৰতো একে কথাই প্ৰযোজ্য। যিবোৰ খাদ্য তাপ প্ৰয়োগ কৰি সংৰক্ষণ কৰা হয়, সেইবোৰ সহজে নষ্ট নহয়।
